بھارت کی مشہور اور لیجنڈری گلوکارہ آشا بھوسلے 92 سال کی عمر میں انتقال کر گئی ہیں، جس کے ساتھ ہی بھارتی موسیقی کے ایک شاندار دور کا اختتام ہو گیا۔
بھارتی میڈیا رپورٹس کے مطابق انہیں طبیعت خراب ہونے پر ممبئی کے بریچ کینڈی اسپتال میں داخل کیا گیا تھا، جہاں وہ زیر علاج تھیں۔
بتایا گیا ہے کہ وہ سینے کے انفیکشن میں مبتلا تھیں، جبکہ بعد ازاں متعدد اعضا کے کام چھوڑ دینے کے باعث ان کا انتقال ہو گیا۔
ان کے بیٹے آنند بھوسلے نے تصدیق کی ہے کہ ان کی آخری رسومات کل شام ادا کی جائیں گی۔
اس سے قبل ان کی پوتی زنائی بھوسلے نے سوشل میڈیا پلیٹ فارم ایکس (X) پر ان کی بیماری کی خبر شیئر کرتے ہوئے مداحوں سے پرائیویسی کا احترام کرنے کی اپیل کی تھی۔
My grandmother, Asha Bhosle due to extreme exhaustion and suffering a chest infection has been admitted to hospital and we request you to value our privacy. Treatment is ongoing and hopefully everything will be well and we shall update you positively.
— Zanai Bhosle (@ZanaiBhosle) April 11, 2026
انہوں نے اپنی پوسٹ میں بتایا تھا کہ آشا بھوسلے کو شدید تھکن اور سینے کے انفیکشن کے باعث اسپتال منتقل کیا گیا تھا اور ان کی صحت یابی کے لیے دعائیں کی گئی تھیں۔
آشا بھوسلے نے بالی ووڈ میں اپنے طویل کیریئر کے دوران بے شمار سپر ہٹ گانے دیے اور انہیں 2000 میں دادا صاحب پھالکے ایوارڈ جبکہ 2008 میں پدم وبھوشن سے نوازا گیا تھا۔