پاکستان کرکٹ ٹیم کے سابق کپتان اظہرعلی کو اسکاٹ لینڈ کرکٹ نے اپنی قومی ٹیم کے ساتھ کنسلٹنٹ مقرر کر دیا ہے۔ کرکٹ اسکاٹ لینڈ کی جانب سے جاری اعلامیے میں اس تقرری کی باضابطہ تصدیق کی گئی۔
اعلامیے کے مطابق اظہر علی اسکاٹ لینڈ کرکٹ ٹیم کے ساتھ بطور کنسلٹنٹ کام کریں گے اور انہیں آئندہ دورہ نیپال کے لیے اہم ذمہ داریاں سونپی گئی ہیں۔ سابق پاکستانی کپتان اپنی تجربہ کار کرکٹ سوچ اور بین الاقوامی تجربے سے ٹیم کی رہنمائی کریں گے۔
اسکاٹ لینڈ کرکٹ ٹیم کی اگلی بڑی اسائنمنٹ آئی سی سی کرکٹ ورلڈ کپ لیگ ٹو (CWC League 2) ہے، جس میں ٹیم نیپال اور امریکا کے خلاف میدان میں اترے گی۔ ٹیم مینجمنٹ کو امید ہے کہ اظہر علی کی شمولیت کھلاڑیوں کی کارکردگی بہتر بنانے میں مددگار ثابت ہوگی۔
Azhar Ali نے اپنے بیان میں کہا کہ وہ اسکاٹ لینڈ کرکٹ ٹیم کے ساتھ کام کرنے کیلئے بے حد پرجوش ہیں۔ ان کے مطابق ان کے کیریئر کے ابتدائی دنوں سے ہی اسکاٹ لینڈ کے ساتھ تعلق موجود رہا ہے، جس کی وجہ سے اس نئی ذمہ داری کو خاص اہمیت دیتے ہیں۔
انہوں نے کہا کہ اسکاٹ لینڈ کی ٹیم میں باصلاحیت کھلاڑی موجود ہیں اور وہ اپنی مہارت اور تجربے کے ذریعے ٹیم کی ترقی میں کردار ادا کرنا چاہتے ہیں۔ اظہر علی نے امید ظاہر کی کہ ٹیم آنے والے مقابلوں میں اچھی کارکردگی دکھائے گی۔
کرکٹ ماہرین کے مطابق اظہر علی جیسے تجربہ کار کھلاڑی کی موجودگی اسکاٹ لینڈ کی ٹیم کے لیے فائدہ مند ثابت ہوسکتی ہے، خاص طور پر نوجوان بیٹرز کو تکنیکی رہنمائی فراہم کرنے میں ان کا کردار اہم ہوگا۔
واضح رہے کہ اظہرعلی پاکستان کرکٹ کی تاریخ کے کامیاب ترین بیٹرز میں شمار ہوتے ہیں اور وہ قومی ٹیم کی قیادت بھی کر چکے ہیں۔ ان کے پاس طویل بین الاقوامی تجربہ موجود ہے جسے اب وہ کوچنگ اور مشاورتی کردار میں استعمال کریں گے۔
