واشنگٹن میں جاری بیان کے مطابق امریکا ایران جنگ بندی کو وائٹ ہاؤس نے ایک بڑی کامیابی قرار دیا ہے۔ حکام کا کہنا ہے کہ یہ پیش رفت امریکی حکمت عملی اور قیادت کا نتیجہ ہے۔

وائٹ ہاؤس کی ترجمان کیرولین لیویٹ نے دعویٰ کیا کہ دو ہفتوں کی جنگ بندی کا اعلان امریکا کی واضح فتح ہے، جسے ڈونلڈ ٹرمپ اور امریکی فوج کی مؤثر حکمت عملی نے ممکن بنایا۔

انہوں نے کہا کہ امریکی افواج نے صرف 38 دنوں میں اپنے بنیادی عسکری اہداف حاصل کیے بلکہ ان سے آگے بھی بڑھ گئے۔ ان کے مطابق آپریشن Operation Epic Fury کے آغاز سے ہی اس کی مدت 4 سے 6 ہفتے رکھی گئی تھی۔

ترجمان کا کہنا تھا کہ اس فوجی کامیابی نے ایران پر دباؤ بڑھایا، جس کے نتیجے میں امریکا کو سخت مذاکرات کا موقع ملا۔ ان کے مطابق اب سفارتی حل اور طویل مدتی امن کی راہ ہموار ہو چکی ہے۔

انہوں نے مزید کہا کہ صدر ٹرمپ نے آبنائے ہرمز کو دوبارہ کھلوانے میں کردار ادا کیا، تاہم رپورٹس کے مطابق یہ گزرگاہ پہلے بھی کھلی تھی جبکہ ایران نے واضح کیا ہے کہ آمد و رفت اس کی نگرانی میں ہوگی۔