ملتان: ایف آئی اے ملتان ایئرپورٹ کارروائی کے دوران ایک خاتون مسافر کی مبینہ طور پر غیر قانونی راستے سے اٹلی جانے کی کوشش ناکام بنا دی گئی۔ وفاقی تحقیقاتی ادارے (ایف آئی اے) کے امیگریشن سرکل نے کارروائی کرتے ہوئے خاتون کو آف لوڈ کر کے مزید تفتیش کے لیے اینٹی ہیومن ٹریفکنگ سرکل کے حوالے کر دیا۔

ایف آئی اے کے مطابق سائرہ ناہید نامی خاتون فلائٹ نمبر FZ340 کے ذریعے وزٹ ویزے پر ترکیہ جا رہی تھیں۔ امیگریشن کلیئرنس کے دوران ان کے سفری مقصد اور دستاویزات پر شبہ ہونے کے بعد انہیں مزید پوچھ گچھ کے لیے روک لیا گیا۔

ابتدائی تحقیقات میں معلوم ہوا کہ خاتون کا اصل منصوبہ ترکیہ سے غیر قانونی ذرائع استعمال کرتے ہوئے اٹلی پہنچنے کا تھا۔ تفتیش کے مطابق وہ فیصل آباد کے ایک مبینہ ایجنٹ کے رابطے میں تھیں، جس نے انہیں یورپ بھجوانے کا وعدہ کر کے لاکھوں روپے وصول کیے۔

ایف آئی اے حکام کے مطابق مبینہ ایجنٹ نے خاتون سے 10 لاکھ روپے بطور پیشگی رقم وصول کی، جبکہ باقی رقم اٹلی پہنچنے کے بعد ادا کی جانی تھی۔ منصوبے کے تحت ترکیہ پہنچنے پر انسانی اسمگلنگ سے منسلک مبینہ نیٹ ورک کے افراد انہیں وصول کرتے اور بعد ازاں غیر قانونی طریقے سے سرحد عبور کرا کے اٹلی منتقل کرتے۔

ایف آئی اے نے خاتون مسافر کو آف لوڈ کر کے مزید قانونی کارروائی اور تحقیقات کے لیے ایف آئی اے اینٹی ہیومن ٹریفکنگ سرکل ملتان کے حوالے کر دیا ہے۔ حکام کا کہنا ہے کہ مبینہ ایجنٹ اور اس کے نیٹ ورک کی شناخت اور گرفتاری کے لیے تحقیقات کا دائرہ وسیع کر دیا گیا ہے۔

ایف آئی اے نے شہریوں کو ایک بار پھر خبردار کیا ہے کہ بیرونِ ملک ملازمت یا امیگریشن کے نام پر غیر قانونی راستوں اور غیر رجسٹرڈ ایجنٹس پر اعتماد نہ کریں۔ حکام کے مطابق ایسے نیٹ ورکس نہ صرف مالی نقصان کا باعث بنتے ہیں بلکہ انسانی اسمگلنگ جیسے سنگین جرائم کو بھی فروغ دیتے ہیں، جس کے نتیجے میں مسافروں کو قانونی پیچیدگیوں اور جان کے خطرات کا سامنا کرنا پڑ سکتا ہے۔