اگر آپ روزمرہ سفر، راستوں کی تلاش یا مقامات کی معلومات کے لیے گوگل میپس استعمال کرتے ہیں تو کمپنی کا نیا فیچر یقیناً آپ کی دلچسپی کا باعث بنے گا۔
گوگل نے اسٹریٹ ویو سروس کی 15 ویں سالگرہ کے موقع پر ایک اہم اپ ڈیٹ متعارف کرائی ہے جس کے ذریعے صارفین اب اپنے اسمارٹ فونز پر پرانی اسٹریٹ ویو تصاویر بھی دیکھ سکیں گے۔
اس سے قبل ماضی کی اسٹریٹ ویو تصاویر دیکھنے کا فیچر صرف ڈیسک ٹاپ اور لیپ ٹاپ صارفین کے لیے دستیاب تھا، تاہم موبائل صارفین کی بڑھتی ہوئی تعداد کو مدنظر رکھتے ہوئے گوگل نے اسے اینڈرائیڈ اور آئی او ایس ایپس کا حصہ بنا دیا ہے۔
نئے فیچر کی بدولت صارفین کسی بھی مقام کی گزشتہ برسوں کی تصاویر تک رسائی حاصل کرسکیں گے۔ اس سے یہ جاننا ممکن ہوگا کہ کسی علاقے، سڑک، عمارت یا مشہور مقام کی ظاہری شکل وقت کے ساتھ کس طرح تبدیل ہوئی۔
اس فیچر کو استعمال کرنے کے لیے صارفین کو گوگل میپس میں اسٹریٹ ویو امیج کھولنی ہوگی اور پھر "See More Dates” کے آپشن پر کلک کرنا ہوگا۔ اس کے بعد دستیاب پرانی تصاویر کی فہرست سامنے آجائے گی۔
تصاویر کی دستیابی مقام اور علاقے کے حساب سے مختلف ہوسکتی ہے۔ بعض شہروں اور مقامات کے لیے کئی سال پرانا ریکارڈ دستیاب ہوگا، جبکہ کچھ علاقوں میں محدود تصاویر موجود ہوسکتی ہیں۔
گوگل کا کہنا ہے کہ اس اپ ڈیٹ کا مقصد صارفین کو اپنے ماحول اور شہروں میں وقت کے ساتھ آنے والی تبدیلیوں کو بہتر انداز میں دیکھنے کا موقع فراہم کرنا ہے۔
