پاکستان کرکٹ ٹیم کے اہم مڈل آرڈر بیٹر سعود شکیل کی ویسٹ انڈیز اور انگلینڈ کے خلاف آئندہ ٹیسٹ سیریز کے لیے قومی اسکواڈ میں شمولیت غیر یقینی صورت حال اختیار کر گئی ہے۔ ذرائع کے مطابق فٹنس مسائل اور انجری سے مکمل صحت یابی نہ ہونے کے باعث ان کی دستیابی پر سوالیہ نشان لگ گیا ہے۔
ذرائع کا کہنا ہے کہ سعود شکیل کی انجری سے بحالی کا عمل جاری ہے اور ٹیم مینجمنٹ ان کی فٹنس کا مسلسل جائزہ لے رہی ہے۔ تاہم موجودہ صورتحال کے پیش نظر سلیکٹرز متبادل کھلاڑیوں پر بھی غور کر رہے ہیں تاکہ کسی ممکنہ خلا کو بروقت پُر کیا جا سکے۔
اطلاعات کے مطابق قومی ریڈ بال کیمپ میں ایک اضافی مڈل آرڈر بیٹر کو طلب کرنے کی تیاری کی جا رہی ہے۔ یہ فیصلہ اس خدشے کے تحت کیا جا رہا ہے کہ اگر سعود شکیل مکمل فٹ نہ ہو سکے تو ٹیم کو متبادل آپشن دستیاب ہو۔
ذرائع نے مزید بتایا کہ حالیہ دنوں میں انجری مسائل نے قومی سلیکشن کمیٹی کے لیے مشکلات پیدا کر دی ہیں۔ متعدد اہم کھلاڑیوں کی فٹنس سے متعلق خدشات کے باعث ٹیسٹ اسکواڈ میں متوقع تبدیلیوں پر غور کیا جا رہا ہے۔
سعود شکیل سے قبل قومی ٹیم کے تجربہ کار وکٹ کیپر بیٹر محمد رضوان کے بھی مکمل فٹ نہ ہونے کی اطلاعات سامنے آئی تھیں۔ ان کی غیر یقینی دستیابی کے باعث روحیل نذیر کو ریڈ بال کیمپ میں شامل کیا گیا تاکہ ٹیم انتظامیہ کے پاس بیک اپ آپشن موجود رہے۔
پاکستان ٹیم اس وقت ویسٹ انڈیز اور انگلینڈ کے دوروں کی تیاریوں میں مصروف ہے۔ ریڈ بال کیمپ میں کھلاڑیوں کی فٹنس، تکنیکی صلاحیتوں اور میچ صورتحال کے مطابق تیاریوں پر خصوصی توجہ دی جا رہی ہے تاکہ ٹیم آئندہ چیلنجز کے لیے مکمل طور پر تیار ہو سکے۔
