پاکستان کرکٹ ٹیم کے سابق کپتان وسیم اکرم کا پالتو کتا ڈیوک بالآخر مل گیا ہے۔ چند روز قبل کراچی کے علاقے ڈی ایچ اے فیز 8 سے لاپتہ ہونے والے کتے کی تلاش کے لیے وسیم اکرم نے عوام سے مدد کی اپیل کی تھی، جس کے بعد سوشل میڈیا پر بھی اس حوالے سے پیغامات گردش کرتے رہے۔
وسیم اکرم نے اپنے پالتو کتے کی تلاش کے لیے انسٹاگرام اسٹوری کے ذریعے اعلان کیا تھا کہ ڈیوک کو تلاش کرنے والے شخص کے لیے 2 لاکھ 50 ہزار روپے نقد انعام دیا جائے گا۔ انہوں نے بتایا تھا کہ کتے کا نام ڈیوک ہے، اس کا رنگ کالا ہے اور وہ کم عمر ہے۔
سابق کپتان نے سوشل میڈیا پر جاری پیغام میں مداحوں اور شہریوں سے اپیل کی تھی کہ اگر کسی کو ان کے پالتو کتے کے بارے میں کوئی معلومات ملے تو فوری طور پر آگاہ کیا جائے تاکہ اسے بحفاظت واپس لایا جا سکے۔
بعد ازاں وسیم اکرم نے ایک ویڈیو پیغام کے ذریعے تصدیق کی کہ ان کا پالتو کتا ڈیوک مل گیا ہے۔ انہوں نے کتے کی واپسی میں مدد کرنے والے تمام افراد، مداحوں اور پولیس اہلکاروں کا خصوصی شکریہ ادا کیا۔
وسیم اکرم نے اپنی ویڈیو میں ان لوگوں کی کوششوں کو سراہا جنہوں نے ڈیوک کی تلاش میں تعاون کیا اور اسے دوبارہ گھر پہنچانے میں کردار ادا کیا۔ ان کا کہنا تھا کہ عوام کی مدد اور تعاون کے باعث یہ ممکن ہو سکا۔
View this post on Instagram
دوسری جانب وسیم اکرم کی اہلیہ شنیرا اکرم نے بھی انسٹاگرام اسٹوری کے ذریعے ڈیوک کی تصاویر شیئر کیں اور خوشی کا اظہار کیا۔ پالتو کتے کی واپسی کی خبر پر مداحوں نے بھی خوشی کا اظہار کیا اور سابق کپتان کے ساتھ اپنی نیک خواہشات کا اظہار کیا۔
