اسلام آباد: وفاقی بجٹ کے حوالے سے پاکستان پیپلزپارٹی اور حکومت کے درمیان پیدا ہونے والے اختلافات تاحال ختم نہیں ہو سکے، جس کے باعث پیپلزپارٹی کے چیئرمین بلاول بھٹو زرداری نے قومی اسمبلی میں بجٹ پر اپنی تقریر احتجاجاً ملتوی کر دی۔
پارٹی ذرائع کے مطابق پیپلزپارٹی کے سینئر رہنما نوید قمر نے بلاول بھٹو زرداری کو وفاقی بجٹ سے متعلق تفصیلی بریفنگ دی۔ اس موقع پر بجٹ تجاویز، مالی اعداد و شمار اور حکومتی وعدوں کے حوالے سے مختلف امور پر تبادلہ خیال کیا گیا۔
ذرائع کا کہنا ہے کہ بریفنگ کے دوران نوید قمر نے بلاول بھٹو کو آگاہ کیا کہ بجٹ کی تیاری کے دوران پیپلزپارٹی کے ساتھ مشاورت میں جو تجاویز اور اعداد و شمار شیئر کیے گئے تھے، ان میں اور قومی اسمبلی میں پیش کیے گئے بجٹ میں واضح فرق پایا جاتا ہے۔
ان اختلافات پر پیپلزپارٹی کی قیادت نے تشویش کا اظہار کیا ہے۔ پارٹی رہنماؤں کا مؤقف ہے کہ بجٹ دستاویز میں شامل بعض نکات مشاورت کے دوران طے پانے والے معاملات سے مطابقت نہیں رکھتے، جس پر حکومت سے وضاحت طلب کی جائے گی۔
ذرائع کے مطابق پیپلزپارٹی اس معاملے کو سنجیدگی سے لے رہی ہے اور جلد ہی ایک اعلیٰ سطحی وفد حکومتی نمائندوں سے رابطہ کرے گا۔ اس ملاقات میں بجٹ سے متعلق تحفظات اور اختلافی نکات پر تفصیلی بات چیت متوقع ہے۔
