پنجاب ڈیجیٹل ٹرانسفارمیشن پروگرام کے لیے اہم پیش رفت سامنے آئی ہے، جہاں عالمی بینک نے کنیکٹڈ پنجاب پروگرام کے لیے 7 کروڑ ڈالر کی مالی معاونت کی منظوری دے دی ہے۔ اس منصوبے کا مقصد 2031 تک صوبے میں براڈبینڈ انٹرنیٹ، ڈیجیٹل سرکاری خدمات اور جدید ڈیجیٹل انفراسٹرکچر کو فروغ دینا ہے۔

عالمی بینک کے مطابق کنیکٹڈ پنجاب پروگرام کے تحت مزید 21 لاکھ افراد کو براڈبینڈ انٹرنیٹ سے منسلک کیا جائے گا، جبکہ پنجاب میں فکسڈ براڈبینڈ کوریج 78 لاکھ سے بڑھا کر 99 لاکھ افراد تک پہنچانے کا ہدف مقرر کیا گیا ہے تاکہ شہریوں کو بہتر ڈیجیٹل سہولیات میسر آ سکیں۔

منصوبے کے تحت پنجاب میں ڈیجیٹل انفراسٹرکچر کی ترقی کے لیے 5 کروڑ ڈالر کی نجی سرمایہ کاری متوقع ہے۔ اس کے علاوہ رائٹ آف وے (RoW) اجازت ناموں کی منظوری کا دورانیہ 90 دن سے کم کرکے صرف 21 دن کرنے کا ہدف رکھا گیا ہے تاکہ براڈبینڈ نیٹ ورک کی توسیع تیز کی جا سکے۔

پنجاب ڈیجیٹل ٹرانسفارمیشن پروگرام کے تحت 2031 تک تقریباً 2 کروڑ 89 لاکھ افراد کو بہتر ڈیجیٹل سرکاری خدمات فراہم کی جائیں گی۔ عالمی بینک کے مطابق اس منصوبے میں مصنوعی ذہانت (AI) پر مبنی سرکاری خدمات کے لیے جدید ڈیجیٹل انفراسٹرکچر بھی قائم کیا جائے گا۔

منصوبے میں ڈیجیٹل انوائس مینجمنٹ سسٹم متعارف کرانے اور کیش لیس ادائیگیوں کے فروغ کے لیے بھی اقدامات شامل ہیں۔ حکام کا ہدف ہے کہ 2031 تک ساڑھے 3 لاکھ افراد کو فعال طور پر ڈیجیٹل ادائیگیوں کے نظام سے منسلک کیا جائے تاکہ مالیاتی شمولیت میں اضافہ ہو۔

عالمی بینک نے خواتین کی ڈیجیٹل شمولیت کو بھی منصوبے کا اہم حصہ قرار دیا ہے۔ پروگرام کے تحت خواتین کی ڈیجیٹل سرکاری خدمات تک رسائی 19 فیصد سے بڑھا کر 30 فیصد کرنے کا ہدف مقرر کیا گیا ہے تاکہ انہیں سرکاری سہولیات تک زیادہ مؤثر رسائی حاصل ہو۔

پنجاب ڈیجیٹل ٹرانسفارمیشن پروگرام پاکستان کے قومی ڈیجیٹل اور مصنوعی ذہانت وژن سے ہم آہنگ ہے۔ عالمی بینک اس منصوبے کے لیے 7 کروڑ ڈالر فراہم کرے گا، جبکہ پنجاب حکومت 20 کروڑ 80 لاکھ ڈالر بطور شراکتی فنڈ دے گی، جس سے کنیکٹڈ پنجاب پروگرام کی مجموعی مالیت 27 کروڑ 80 لاکھ ڈالر ہو جائے گی۔