ساؤتھ ایئر کی اندرون ملک پروازیں کراچی کے جناح انٹرنیشنل ایئرپورٹ سے باضابطہ طور پر شروع ہوگئی ہیں۔ پاکستان ایئرپورٹس اتھارٹی (پی اے اے) کے مطابق نئی سروس سے ملک کے مختلف شہروں کے درمیان فضائی رابطوں میں بہتری آئے گی اور مسافروں کو مزید سفری سہولیات میسر ہوں گی۔

کراچی میں قائم نجی فضائی کمپنی نے کراچی، ٹربت، کوئٹہ اور کراچی، بہاولپور، اسلام آباد روٹس پر شیڈول پروازوں کا آغاز کیا ہے۔ افتتاحی پروازیں Z8911 ٹربت اور Z8942 بہاولپور کے لیے جمعرات کی صبح کراچی سے روانہ ہوئیں۔

پی اے اے کے مطابق نئی پروازیں ان علاقوں کو بہتر فضائی سہولت فراہم کریں گی جہاں سفری مواقع محدود تھے۔ حکام کا کہنا ہے کہ اس اقدام سے علاقائی روابط مضبوط ہوں گے اور کاروباری و سفری سرگرمیوں کو فروغ ملے گا۔

ابتدائی مرحلے میں ساؤتھ ایئر کی اندرون ملک پروازیں ٹربت کے لیے ہفتے میں ایک بار جبکہ بہاولپور کے لیے ہفتے میں تین بار چلائی جائیں گی۔ کمپنی نے مستقبل قریب میں پشاور، رحیم یار خان، سکھر اور گوادر کے لیے بھی پروازیں شروع کرنے کا اعلان کیا ہے۔

یہ ایئرلائن ٹورازم پروموشن اینڈ ریجنل انٹیگریشن (TPRI) لائسنس کے تحت کام کر رہی ہے۔ حکام کے مطابق نئی فضائی سروس سے سیاحت، تجارت اور مختلف علاقوں کے درمیان روابط کو فروغ ملے گا۔

ساؤتھ ایئر نے اپنی سروس کا آغاز جدید ATR 72-600 طیاروں کے ساتھ کیا ہے، جو ایندھن کی بچت، بہتر کارکردگی اور عالمی حفاظتی معیارات پر پورا اترنے کے باعث دنیا بھر میں مختصر اور درمیانے فاصلے کی پروازوں کے لیے استعمال ہوتے ہیں۔

ساؤتھ ایئر کی چیف ایگزیکٹو آفیسر نشاط فاطمہ نے کہا کہ کمپنی مستقبل میں اپنے فضائی بیڑے اور روٹس میں مزید توسیع کرے گی تاکہ ملک کے مزید شہروں کو جدید، محفوظ، بروقت اور معیاری فضائی سفری سہولیات فراہم کی جا سکیں۔