امریکی صدر ڈونلڈ ٹرمپ پر مبینہ قاتلانہ حملے کے بعد منسوخ ہونے والے وائٹ ہاؤس پریس ڈنر کو دوبارہ منعقد کرنے کا اعلان کردیا گیا ہے۔ تقریب اب 24 جولائی کو منعقد ہوگی اور اس کے لیے تیاریاں شروع کردی گئی ہیں۔
امریکی میڈیا رپورٹس کے مطابق صدر ٹرمپ نے تقریب میں شرکت کی دعوت قبول کرلی ہے۔ یہ عشائیہ امریکی صحافیوں، حکومتی شخصیات اور میڈیا نمائندوں کی ایک اہم سالانہ تقریب تصور کی جاتی ہے، جو آزادی صحافت اور جمہوری روایات کی علامت سمجھی جاتی ہے۔
صدر ٹرمپ نے اپنے بیان میں کہا کہ شدت پسند یا پرتشدد عناصر کو اپنی روزمرہ زندگی یا سرکاری سرگرمیوں پر اثرانداز ہونے کی اجازت نہیں دی جاسکتی۔ ان کا کہنا تھا کہ ایسے واقعات کے باوجود قومی سرگرمیاں معمول کے مطابق جاری رہنی چاہئیں۔
انہوں نے یہ بھی اشارہ دیا کہ تقریب میں ان کی تقریر کا انداز ماضی سے مختلف ہوسکتا ہے، تاہم اس بارے میں حتمی فیصلہ وقت آنے پر سامنے آئے گا۔ ٹرمپ کے اس بیان نے سیاسی اور میڈیا حلقوں میں نئی بحث چھیڑ دی ہے۔
صدر کے مطابق تقریب واشنگٹن میں واقع والڈورف آسٹوریا کے بال روم میں منعقد ہوگی۔ سکیورٹی خدشات کے پیش نظر اس بار تقریب کے انتظامات پہلے کے مقابلے میں زیادہ سخت اور محدود رکھے جائیں گے۔
یاد رہے کہ اپریل میں منعقد ہونے والی تقریب کے دوران فائرنگ کا واقعہ پیش آیا تھا، جس کے بعد صدر ٹرمپ اور دیگر اعلیٰ حکام کو فوری طور پر محفوظ مقام پر منتقل کردیا گیا تھا۔ واقعے کے نتیجے میں عشائیہ منسوخ کردیا گیا جبکہ حملہ آور کو حراست میں لے لیا گیا تھا۔
24 جولائی کو ہونے والی نئی تقریب کو آزادی صحافت اور سیاسی تشدد کے خلاف ایک علامتی پیغام کے طور پر بھی دیکھا جارہا ہے۔
