مکہ مکرمہ میں غسلِ کعبہ کی سالانہ تقریب عقیدت و احترام کے ساتھ منعقد ہوئی، جہاں خانہ کعبہ کو عرقِ گلاب اور آبِ زمزم سے غسل دیا گیا۔ اس روح پرور تقریب میں مختلف اسلامی ممالک کے سفارت کاروں، علما، مشائخ، اسلامی تعاون تنظیم (او آئی سی) کے نمائندوں اور دیگر معزز شخصیات نے شرکت کی۔
تقریب مسجد الحرام میں نمازِ فجر کے بعد منعقد ہوئی۔ خادم الحرمین الشریفین کی نیابت کرتے ہوئے گورنر مکہ شہزادہ سعود بن مشعل نے غسلِ کعبہ کی رسم میں شرکت کی اور روایتی طریقے کے مطابق اس مقدس فریضے کی نگرانی کی۔
غسل کے لیے آبِ زمزم اور عرقِ گلاب سے تیار کردہ خوشبودار محلول استعمال کیا گیا، جس سے خانہ کعبہ کے اندرونی حصے کو صاف کیا گیا۔ یہ تقریب ہر سال اسلامی روایت کے مطابق انتہائی عقیدت اور منظم انداز میں منعقد کی جاتی ہے۔
The door curtain of the Holy Ka’bah has been raised to protect the Kiswah during the washing process and to allow easier access inside the Ka’bah.#HaramainInfo #Muharram #1448H pic.twitter.com/0ipCUGPlUx
— 𝗛𝗮𝗿𝗮𝗺𝗮𝗶𝗻 (@HaramainInfo) June 29, 2026
تقریب کے دوران زائرین کی محدود تعداد کو طواف کی اجازت دی گئی، جبکہ مسجد الحرام میں سکیورٹی کے سخت انتظامات کیے گئے تاکہ تقریب پرامن اور منظم انداز میں مکمل ہو سکے۔
کسوہ کی حفاظت کے پیشِ نظر غسل کے دوران خانہ کعبہ کے دروازے پر نصب پردے کو عارضی طور پر اوپر اٹھا دیا گیا، جس سے اندرونی حصے تک آسان رسائی ممکن بنائی گئی اور غسل کی کارروائی بغیر کسی رکاوٹ کے انجام دی گئی۔
غسلِ کعبہ کی سالانہ تقریب اسلامی دنیا کے اہم مذہبی مواقع میں شمار ہوتی ہے، جسے دنیا بھر کے مسلمان عقیدت کی نگاہ سے دیکھتے ہیں۔ یہ روایت خانہ کعبہ کی خدمت، صفائی اور تقدس کے اظہار کی علامت سمجھی جاتی ہے۔
