کوئٹہ: بلوچستان کے ضلع مستونگ میں سکیورٹی فورسز نے انٹیلی جنس اطلاعات کی بنیاد پر کارروائی کرتے ہوئے 4 مبینہ دہشت گردوں کو ہلاک کرنے کا دعویٰ کیا ہے، جبکہ اس دوران اسلحہ اور گولہ بارود بھی برآمد کیا گیا۔

سکیورٹی ذرائع کے مطابق کارروائی مستونگ کے علاقے کھڈکوچہ میں کی گئی، جہاں مبینہ طور پر مسلح افراد کی موجودگی کی اطلاع پر فورسز نے آپریشن کیا۔

ذرائع کا کہنا ہے کہ کارروائی کے دوران چار مبینہ دہشت گرد مارے گئے۔ موقع سے بھاری مقدار میں اسلحہ، گولہ بارود اور دیگر سامان بھی برآمد کیا گیا۔

سکیورٹی ذرائع کے مطابق دہشت گردوں کے زیر استعمال کئی موٹرسائیکلیں بھی تحویل میں لے لی گئی ہیں، جنہیں مبینہ طور پر نقل و حرکت کے لیے استعمال کیا جا رہا تھا۔

ذرائع نے یہ بھی دعویٰ کیا کہ کارروائی کے دوران متعدد دیگر مبینہ دہشت گرد زخمی ہوئے، تاہم اس حوالے سے آزاد ذرائع سے فوری طور پر تصدیق نہیں ہو سکی۔

آپریشن کے دوران دہشت گردوں کی مبینہ سہولت کاری میں ملوث کئی مشتبہ افراد کو بھی حراست میں لیا گیا ہے، جن سے مزید تفتیش جاری ہے۔

سکیورٹی ذرائع کے مطابق علاقے میں سرچ اور کلیئرنس آپریشن بھی جاری ہے تاکہ کسی ممکنہ خطرے کا مکمل خاتمہ کیا جا سکے۔