وزیراعظم شہباز شریف نے کہا ہے کہ پاکستان میں آبادی میں اضافہ ملک کا سب سے بڑا چیلنج بن چکا ہے اور آبادی کی مؤثر منصوبہ بندی کو قومی ترقی، معاشی استحکام اور انسانی وسائل کی بہتری سے جوڑنا ناگزیر ہے۔ اسلام آباد میں جمعرات کو آبادی بہبود سے متعلق اعلیٰ سطحی اجلاس کی صدارت کرتے ہوئے انہوں نے آبادی پر قابو پانے کو قومی ذمہ داری قرار دیا۔

وزیراعظم نے فوری طور پر قومی آبادی کونسل کا اجلاس بلانے کی ہدایت کی۔ وزیراعظم آفس کے مطابق اجلاس میں چاروں صوبوں کے وزرائے اعلیٰ، گلگت بلتستان کی قیادت، آزاد جموں و کشمیر کے وزیراعظم اور دیگر متعلقہ فریقین شرکت کریں گے تاکہ ایک جامع قومی حکمت عملی کو حتمی شکل دی جا سکے۔

اجلاس کو بتایا گیا کہ حکومت پاکستان میں آبادی میں اضافہ کم کرنے کے لیے نیشنل اسٹیبلائزیشن پلان 2026–2035 تیار کر رہی ہے۔ مجوزہ منصوبے کے تحت 2035 تک آبادی میں سالانہ اضافے کی شرح 2.55 فیصد سے کم کرکے 1.25 فیصد کرنے کا ہدف مقرر کیا گیا ہے۔

حکام نے بریفنگ میں بتایا کہ اس منصوبے میں صحت، تعلیم، نوجوانوں کی ترقی، فنی تربیت، سماجی تحفظ اور خواتین کی افرادی قوت میں شمولیت پر خصوصی توجہ دی جائے گی۔ حکومت کا مؤقف ہے کہ یہ شعبے پائیدار ترقی کے لیے بنیادی اہمیت رکھتے ہیں۔

اجلاس کو یہ بھی بتایا گیا کہ متعدد وفاقی سماجی تحفظ کے پروگراموں کو آبادی بہبود کے اقدامات سے منسلک کرنے پر کام شروع کر دیا گیا ہے تاکہ فلاحی منصوبوں اور آبادی کی منصوبہ بندی کے درمیان مؤثر رابطہ قائم کیا جا سکے۔

وزیراعظم شہباز شریف نے ہدایت کی کہ عوامی آگاہی مہمات کو مزید مؤثر بنایا جائے اور وفاقی و صوبائی اداروں کے درمیان قریبی تعاون کو یقینی بنایا جائے تاکہ قومی اہداف بروقت حاصل کیے جا سکیں۔ انہوں نے کہا کہ آبادی کی بہتر منصوبہ بندی ہی پائیدار معاشی ترقی کی بنیاد بن سکتی ہے۔

پاکستان میں آبادی میں اضافہ سے متعلق جائزہ اجلاس میں وزیر منصوبہ بندی احسن اقبال، وزیر اقتصادی امور احد خان چیمہ، وزیر قومی صحت سید مصطفیٰ کمال، وزیر اطلاعات عطا اللہ تارڑ اور دیگر اعلیٰ حکام نے شرکت کی۔ اجلاس میں قومی آبادی کونسل کے آئندہ اجلاس اور طویل المدتی حکمت عملی پر بھی غور کیا گیا۔