یوٹیوب شارٹس کسٹم تھمب نیلز کا انتظار کرنے والے صارفین کے لیے خوشخبری آگئی ہے، کیونکہ یوٹیوب نے ایک نیا فیچر متعارف کرا دیا ہے جس کے ذریعے اہل صارفین اپنی شارٹس ویڈیوز کے لیے پسند کے تھمب نیلز اپ لوڈ اور تبدیل کر سکیں گے۔
کمپنی کے مطابق یہ سہولت فی الحال صرف ان کریئیٹرز کو دستیاب ہوگی جو یوٹیوب پارٹنر پروگرام کا حصہ ہیں اور اپنی ویڈیوز سے آمدنی حاصل کر رہے ہیں۔ یہ صارفین اب اپنی شارٹس کے لیے کسٹم تھمب نیل تصاویر اپ لوڈ کر سکیں گے۔
یوٹیوب کا کہنا ہے کہ اس فیچر کا مقصد کریئیٹرز کو اپنی ویڈیوز کی بہتر پیشکش کا موقع فراہم کرنا ہے تاکہ زیادہ پرکشش تھمب نیلز کے ذریعے ناظرین کی توجہ حاصل کی جا سکے۔
اس کے علاوہ صارفین ڈیسک ٹاپ یا لیپ ٹاپ پر یوٹیوب اسٹوڈیو کے ذریعے پہلے سے اپ لوڈ کی گئی شارٹس ویڈیوز کے تھمب نیلز بھی تبدیل کر سکیں گے۔ اس سے ویڈیو دوبارہ اپ لوڈ کیے بغیر اس کی ظاہری شکل بہتر بنانا ممکن ہوگا۔
کمپنی نے بتایا کہ مستقبل قریب میں اس فیچر کو مزید صارفین تک بھی مرحلہ وار توسیع دی جائے گی تاکہ زیادہ سے زیادہ کریئیٹرز اس سہولت سے فائدہ اٹھا سکیں۔
کمپیوٹر پر صارفین کو یوٹیوب کی جانب سے تجویز کیے گئے تین مختلف فریمز میں سے کسی ایک کو تھمب نیل کے طور پر منتخب کرنے کا اختیار ہوگا۔ یہ سہولت پہلے طویل ویڈیوز کے لیے دستیاب تھی اور اب شارٹس تک بھی بڑھا دی گئی ہے۔
موبائل ایپ استعمال کرنے والے صارفین حسبِ سابق اپنی ویڈیو کے کسی بھی فریم کو تھمب نیل کے طور پر منتخب کر سکیں گے۔ یوٹیوب کے مطابق مستقبل میں تھمب نیلز کی تجاویز ویڈیو کے موضوع، انداز اور مواد کو مدنظر رکھتے ہوئے مزید مؤثر بنائی جائیں گی۔
