کراچی بارش کی پیشگوئی کے حوالے سے محکمہ موسمیات نے اہم اطلاع جاری کرتے ہوئے کہا ہے کہ شہر قائد میں یکم اگست کی شام سے بارش کا امکان ہے۔ موسمیاتی ماہرین کے مطابق موجودہ موسمی نظام کے اثرات کے باعث کراچی سمیت سندھ کے مختلف علاقوں میں وقفے وقفے سے بارش ہوسکتی ہے۔
محکمہ موسمیات کے مطابق خلیج بنگال میں بننے والا ہوا کا شدید کم دباؤ تاحال فعال ہے اور یہ موسمی نظام اس وقت ڈیپ ڈپریشن کی شکل میں بھارتی ریاست مدھیہ پردیش میں موجود ہے۔ حکام کا کہنا ہے کہ آنے والے چند گھنٹوں کے دوران اس نظام کی شدت میں کمی آنا شروع ہو جائے گی۔
موسمیاتی ادارے کے مطابق یہ سسٹم آئندہ 12 گھنٹوں میں کمزور ہونا شروع ہوگا، جبکہ ڈپریشن کی شکل اختیار کرنے کے بعد تقریباً 24 سے 36 گھنٹوں کے دوران دوبارہ کم دباؤ کے نظام میں تبدیل ہونے کا امکان ہے۔ اس موسمی تبدیلی کے اثرات پاکستان کے مختلف علاقوں پر مرتب ہو سکتے ہیں۔
محکمہ موسمیات نے بتایا کہ بحیرہ عرب اور خلیج بنگال سے آنے والی ہوائیں ملک کے بالائی اور وسطی علاقوں میں داخل ہو رہی ہیں، جبکہ مغربی ہواؤں کا سلسلہ بھی شمالی علاقوں پر اثر انداز ہو رہا ہے۔ ان موسمی حالات کے باعث سندھ کے مختلف اضلاع میں بارش کا امکان ظاہر کیا گیا ہے۔
پیشگوئی کے مطابق تھرپارکر، عمرکوٹ، مٹھی، سانگھڑ اور حیدرآباد سمیت سندھ کے مختلف علاقوں میں 31 جولائی کی شام یا رات سے 2 اگست تک وقفے وقفے سے بارش متوقع ہے۔ بعض علاقوں میں گرج چمک کے ساتھ بارش بھی ہو سکتی ہے۔
کراچی کے حوالے سے محکمہ موسمیات کا کہنا ہے کہ موسمی نظام کے زیر اثر شہر میں یکم اگست کی شام سے 2 اگست تک ہلکی سے معتدل شدت کی بارش کا امکان ہے۔ تاہم ماہرین کے مطابق موجودہ سسٹم کے باعث کراچی میں شدید یا موسلا دھار بارش کے امکانات کم ہیں۔
