اسلام آباد کے علاقے گلبرگ گرینز میں قائم ایک کال سینٹر کے خلاف بڑی کارروائی کرتے ہوئے غیر قانونی سرگرمیوں میں مبینہ طور پر ملوث 284 غیر ملکی شہریوں کو گرفتار کر لیا گیا ہے۔ حکام کے مطابق گرفتار افراد کے ویزے منسوخ کرنے کا فیصلہ کیا گیا ہے جبکہ ان کے خلاف مزید کارروائی بھی شروع کر دی گئی ہے۔

ذرائع کے مطابق گلبرگ گرینز سے گرفتار کیے گئے تمام غیر ملکی شہریوں کو 15 روز کے اندر پاکستان سے واپس بھیجنے کا فیصلہ کیا گیا ہے۔ گرفتار افراد کے نام بلیک لسٹ اور فارنرز کنٹرول لسٹ میں شامل کیے جائیں گے، جس کے بعد ان کی پاکستان آمد پر پابندی عائد ہو سکتی ہے۔

کارروائی کے بعد گلبرگ گرینز میں واقع متعلقہ پلازہ کو سب جیل قرار دے دیا گیا ہے۔ اس حوالے سے باقاعدہ نوٹیفکیشن بھی جاری کر دیا گیا ہے، جس کے مطابق تاحکم ثانی پلازہ سب جیل کا درجہ برقرار رکھے گا۔ سب جیل کے انتظامی اور سکیورٹی معاملات کی ذمہ داری وفاقی تحقیقاتی ادارے (ایف آئی اے) کے سپرد کی گئی ہے۔

ڈی جی ایف آئی اے ڈاکٹر عثمان کے مطابق تحقیقات کے دوران انتہائی تشویش ناک انکشافات سامنے آئے ہیں۔ ان کے مطابق مبینہ طور پر ملزمان جعلی شناختیں بنا کر پاکستانی شہریوں سے رابطہ کرتے تھے اور مختلف ایپلی کیشنز کے ذریعے انہیں اپنے جال میں پھنساتے تھے۔

ایف آئی اے حکام کے مطابق ملزمان مختلف آن لائن ایپلی کیشنز پر سرمایہ کاری کے نام پر پاکستانی شہریوں سے رقم حاصل کرتے تھے۔ تحقیقات میں ایسے کئی پاکستانی شہریوں کے مالی نقصان کا بھی انکشاف ہوا ہے، جنہیں مبینہ طور پر اس نیٹ ورک کے ذریعے نشانہ بنایا گیا۔

ڈی جی ایف آئی اے کے مطابق گرفتار غیر ملکی شہریوں کے مبینہ مقامی سہولت کاروں اور ہینڈلرز کا بھی سراغ لگا لیا گیا ہے۔ تحقیقاتی ادارے اب ان افراد کے کردار اور مبینہ نیٹ ورک سے تعلق کی مزید چھان بین کر رہے ہیں۔