چیئرمین پاکستان پیپلز پارٹی بلاول بھٹو زرداری نے پارلیمان کو مؤثر بنانے کی ضرورت پر زور دیتے ہوئے اپوزیشن جماعتوں کو قائمہ کمیٹیوں میں واپس آنے کی دعوت دی ہے۔ انہوں نے کہا کہ فعال کمیٹیاں پارلیمانی نظام کو مؤثر بنانے میں اہم کردار ادا کرتی ہیں۔
اسلام آباد میں میڈیا سے گفتگو کرتے ہوئے بلاول بھٹو نے کہا کہ پیپلز پارٹی نے ہمیشہ پارلیمان کو عزت دی ہے۔ ان کا کہنا تھا کہ اگر پارلیمان کو مؤثر انداز میں اپنا کردار ادا کرنا ہے تو پارلیمانی قائمہ کمیٹیوں کو فعال بنانا ہوگا۔
بلاول بھٹو پارلیمانی کمیٹیوں سے متعلق گفتگو میں اپوزیشن سے اپنے فیصلے پر نظرثانی کرنے کی امید بھی ظاہر کی۔ انہوں نے کہا کہ اپوزیشن کو قائمہ کمیٹیوں میں واپس آکر اصلاحات کے عمل میں اپنا کردار ادا کرنا چاہیے۔
انہوں نے کہا کہ پیپلز پارٹی نے انتخابی اصلاحات میں ہمیشہ اہم کردار ادا کیا ہے۔ ان کے مطابق موجودہ صورتحال میں اپوزیشن، حکومتی اتحادیوں اور حکومتی وزرا کی جانب سے بھی انتخابی عمل سے متعلق شکایات اور تنقید سامنے آ رہی ہے۔
بلاول بھٹو نے کہا کہ انتخابی عمل سے متعلق اعتراضات دور کرنا تمام سیاسی فریقین کی مشترکہ ذمہ داری ہے۔ ان کے مطابق قائمہ کمیٹیوں میں واپسی سے سیاسی جماعتوں کو اپنے تحفظات پر بات کرنے اور اصلاحات کے عمل کو آگے بڑھانے کا موقع مل سکتا ہے۔
نئے صوبوں کے قیام کے حوالے سے بلاول بھٹو نے کہا کہ پیپلز پارٹی کا مؤقف واضح ہے اور وہ عوام کی رائے کے ساتھ کھڑی ہوگی۔ انہوں نے کہا کہ کسی بھی فیصلے کو زبردستی عوام پر مسلط کرنے کی حمایت نہیں کی جائے گی۔
جنوبی پنجاب کے حوالے سے بلاول بھٹو نے کہا کہ اس معاملے پر پہلے ہی اتفاق رائے موجود ہے۔ تاہم سندھ میں نئے صوبوں کے قیام کے بارے میں انہوں نے کہا کہ جہاں اتفاق رائے موجود نہیں، وہاں نئے صوبے نہیں بنانے چاہئیں۔
