امریکی محکمہ دفاع نے اڑن طشتریوں یعنی یو ایف اوز سے متعلق خفیہ فائلوں کا دوسرا حصہ جاری کر دیا ہے جس کے بعد دنیا بھر میں ایک بار پھر ان پراسرار مشاہدات پر بحث شروع ہو گئی ہے۔ جاری کردہ دستاویزات میں سینکڑوں رپورٹس اور مشاہدات شامل ہیں۔
رپورٹس کے مطابق نئی جاری ہونے والی دستاویزات میں 222 فائلز شامل ہیں جن میں مختلف افراد کے حوالہ جات اور یو ایف او مشاہدات سے متعلق معلومات موجود ہیں۔ ان میں ایک اہم فائل 116 صفحات پر مشتمل ہے جس میں 1948 سے 1950 کے دوران نیو میکسیکو کی ایک خفیہ تنصیب میں ہونے والی تحقیقات اور مشاہدات درج ہیں۔
جاری شدہ ریکارڈ میں فوجی اڈوں اور حساس دفاعی تنصیبات کے قریب 209 مشاہدات بھی شامل کیے گئے ہیں۔ ان انکشافات کے بعد عوامی دلچسپی میں مزید اضافہ دیکھنے میں آ رہا ہے۔
امریکی وزیر دفاع پیٹ ہیگستھ نے اس موقع پر کہا کہ وقت آ گیا ہے کہ امریکی عوام خود ان ریکارڈز کو دیکھیں۔ ان کے بیان کو حکومتی شفافیت کی کوششوں کا حصہ قرار دیا جا رہا ہے۔
امریکی حکومت گزشتہ چند برسوں سے یو ایف اوز سے متعلق معلومات کو مرحلہ وار منظر عام پر لا رہی ہے۔ اس سلسلے میں عوام، محققین اور قانون سازوں کی جانب سے مسلسل مطالبات کیے جا رہے تھے کہ خفیہ ریکارڈ کو عوام کے سامنے پیش کیا جائے۔
تاہم ماہرین کا کہنا ہے کہ اب تک جاری کی جانے والی فائلوں میں کسی خلائی مخلوق یا اجنبی ٹیکنالوجی کے وجود کا کوئی حتمی ثبوت موجود نہیں۔ پہلی قسط کا جائزہ لینے والے ماہرین نے بھی یہی نتیجہ اخذ کیا تھا۔
