وفاقی حکومت نے مالی سال 2026-27 کے بجٹ کی پیشی سے قبل پارلیمانی سرگرمیوں کا آغاز کرتے ہوئے قومی اسمبلی اور سینیٹ کے اجلاس طلب کر لیے ہیں۔ ان اجلاسوں میں ملکی سیاسی اور اقتصادی امور کے ساتھ ساتھ آئندہ مالی سال کے بجٹ سے متعلق اہم معاملات زیر بحث آنے کی توقع ہے۔
صدرِ پاکستان آصف علی زرداری نے وزیراعظم شہباز شریف کی ایڈوائس پر پارلیمنٹ کے دونوں ایوانوں کے اجلاس طلب کیے ہیں۔ اس اقدام کو وفاقی بجٹ کی پیشی کے لیے اہم پیش رفت قرار دیا جا رہا ہے۔
سرکاری اعلامیے کے مطابق قومی اسمبلی کا اجلاس کل شام 5 بجے منعقد ہوگا، جبکہ سینیٹ کا اجلاس اسی روز سہ پہر 4 بجے طلب کیا گیا ہے۔ دونوں ایوانوں میں ملکی صورتحال اور آئندہ مالی سال کے حوالے سے اہم امور پر تبادلہ خیال متوقع ہے۔
وفاقی وزیر برائے پارلیمانی امورطارق فضل چوہدری نے اپنے سوشل میڈیا بیان میں کہا ہے کہ وفاقی بجٹ 12 جون کو قومی اسمبلی میں پیش کیے جانے کا امکان ہے۔ بجٹ اجلاس حکومت کی معاشی پالیسیوں اور ترقیاتی منصوبوں کی سمت کا تعین کرے گا۔
مالی سال 2026-27 کا وفاقی بجٹ محمد اورنگزیب قومی اسمبلی میں پیش کریں گے۔ ماہرین معیشت، کاروباری حلقے اور عوام بجٹ تجاویز کا بے چینی سے انتظار کر رہے ہیں کیونکہ ان کا براہِ راست تعلق مہنگائی، ٹیکسوں، روزگار اور معاشی سرگرمیوں سے ہے۔
سالانہ بجٹ کو پارلیمانی کیلنڈر کا اہم ترین مالیاتی دستاویز تصور کیا جاتا ہے۔ اس میں حکومت آئندہ سال کے لیے آمدنی، اخراجات، ترقیاتی منصوبوں اور مختلف شعبوں کے لیے مالی وسائل مختص کرتی ہے، جس کے اثرات پورے ملک کی معیشت پر مرتب ہوتے ہیں۔
