وزیراعظم شہباز شریف نے ایف بی آر ٹیکس اصلاحات مقررہ مدت میں مکمل کرنے کی ہدایت کردی۔ انہوں نے ٹیکس نظام کو جدید بنانے اور محصولات میں اضافے کے لیے بروقت اقدامات پر زور دیا۔

وزیراعظم نے جمعہ کو اسلام آباد میں فیڈرل بورڈ آف ریونیو اصلاحات کے ہفتہ وار جائزہ اجلاس کی صدارت کی۔ اجلاس میں حکام نے ٹیکس نظام میں جاری اصلاحات پر تفصیلی بریفنگ دی۔

اجلاس میں پاکستان ریونیو آٹومیشن لمیٹڈ کی تنظیم نو، ٹیکس نظام کی ڈیجیٹلائزیشن اور اسمگلنگ روکنے کے اقدامات کا جائزہ لیا گیا۔ حکام نے مختلف منصوبوں پر پیش رفت سے وزیراعظم کو آگاہ کیا۔

حکام نے بتایا کہ IRIS 3.0، نئے ٹیکس آپریٹنگ ماڈل اور مرکزی ڈیٹا ہب پر مرحلہ وار کام جاری ہے۔ ایف بی آر ٹیکس اصلاحات کے تحت ٹیکس نظام کو جدید، مربوط اور ڈیٹا پر مبنی بنانے کے لیے بین الاقوامی ماہرین کی خدمات بھی حاصل کی گئی ہیں۔

بریفنگ میں بتایا گیا کہ PRAL میں ٹیکنالوجی، ڈیٹا سکیورٹی، آپریشنز اور ٹیکس کے شعبوں میں نئی سینئر تقرریاں کی گئی ہیں۔ آٹو ٹیکس کے پائلٹ منصوبے اور مستقبل میں مصنوعی ذہانت کے استعمال پر بھی کام جاری ہے۔

وزیراعظم نے اصلاحات کے تیسرے فریق سے آڈٹ کو یقینی بنانے کی ہدایت کی۔ انہوں نے کہا کہ ڈیجیٹلائزیشن، پیداوار کی نگرانی اور خودکار نظام ایف بی آر ٹیکس اصلاحات کے اہم ستون ہیں۔

شہباز شریف نے ٹیکس چوری، اسمگلنگ اور غیر قانونی کاروبار کے خلاف مؤثر کارروائی مزید تیز کرنے کی ہدایت بھی کی۔ انہوں نے کہا کہ اصلاحات سے ٹیکس نظام جدید اور مؤثر بنایا جائے، محصولات بڑھائے جائیں اور اسمگلنگ کا مکمل خاتمہ کیا جائے۔ ایف بی آر ٹیکس اصلاحات مقررہ مدت میں مکمل ہونی چاہئیں۔