لاہور: پنجاب حکومت نے لاہور میں بسنت منانے کی تاریخوں کا اعلان کردیا ہے۔ حکام کے مطابق محفوظ بسنت 12، 13 اور 14 مارچ 2027 کو منائی جائے گی، جبکہ تہوار کے دوران پتنگ بازی کے لیے حفاظتی انتظامات پر خصوصی توجہ دی جائے گی۔
بسنت کے انتظامات کا جائزہ لینے کے لیے سیکرٹری داخلہ احمد جاوید کی زیر صدارت اجلاس ہوا، جس میں تہوار کے انعقاد اور شہریوں کی حفاظت سے متعلق امور پر غور کیا گیا۔ اجلاس میں فیصلہ کیا گیا کہ پتنگ بازی کے لیے مقررہ حفاظتی ضوابط پر عمل درآمد یقینی بنایا جائے گا۔
سیکرٹری داخلہ کے مطابق شہر میں کسی غیر محفوظ چھت پر پتنگ بازی کی اجازت نہیں ہوگی۔ انہوں نے ہدایت کی کہ 31 دسمبر 2026 سے قبل چھتوں پر کم از کم ساڑھے تین فٹ بلند حفاظتی دیوار تعمیر کی جائے، جبکہ اجازت یافتہ مقامات پر ضرورت کے مطابق چھتوں کی مرمت بھی کروائی جائے۔
احمد جاوید نے ڈپٹی کمشنرز کو پرانی عمارتوں اور رہائشی مکانات کی چھتوں کا مکمل معائنہ کروانے کی ہدایت کی۔ ان کا کہنا تھا کہ اگر کسی عمارت کی حالت غیر تسلی بخش قرار پائے تو متعلقہ ڈپٹی کمشنر وہاں پتنگ بازی پر پابندی عائد کریں۔
حکام کے مطابق پتنگ بازی کے لیے استعمال ہونے والی چھت کی مضبوطی اور پائیداری یقینی بنانا مالک مکان کی ذمہ داری ہوگی۔ اس اقدام کا مقصد کمزور عمارتوں اور غیر محفوظ چھتوں پر پتنگ بازی کے باعث پیش آنے والے ممکنہ حادثات کے خطرات کو کم کرنا ہے۔
سیکرٹری داخلہ نے مزید کہا کہ اگر بجلی کی تاریں چھت کے قریب ہوں تو عمارت کے مالک کو انہیں محفوظ بنانے کے لیے ضروری اقدامات کرنا ہوں گے۔ حفاظتی انتظامات کا مقصد پتنگ بازی کے دوران بجلی کی تاروں سے متعلق حادثات کے امکانات کو کم کرنا ہے۔
