نیپال سیلاب سے ہلاکتوں کی تعداد 270 ہوگئی ہے جبکہ 500 سے زائد سیاح تاحال لاپتا ہیں۔ ضلع راسووا میں اچانک آنے والے سیلاب کے بعد متاثرہ علاقوں میں امدادی کارروائیاں جاری ہیں۔

بدھ کے روز آنے والے سیلابی ریلے نے ضلع راسووا میں بڑے پیمانے پر تباہی مچائی۔ حکام نے لاپتا سیاحوں کی تلاش اور متاثرہ افراد کی مدد کے لیے امدادی ٹیمیں روانہ کردی ہیں۔

نیپال کے سیاحتی حکام کے مطابق لاپتا افراد میں 400 سے زائد غیرملکی شہری بھی شامل ہیں۔ ان میں 142 بھارتی، 54 امریکی، 34 آسٹریلوی اور 33 برطانوی شہری شامل ہیں۔

لاپتا افراد میں 24 کینیڈین، 17 ملائیشین اور 53 یوکرینی شہری بھی شامل ہیں۔ جنوبی کوریا، جنوبی افریقہ، پرتگال اور نیدرلینڈز کے بعض شہری بھی تاحال لاپتا ہیں۔

نیپال سیلاب نے متاثرہ علاقوں میں شدید نقصان پہنچایا ہے اور امدادی کارروائیوں کو بھی مشکل بنا دیا ہے۔ حکام دور دراز علاقوں تک پہنچنے اور لاپتا افراد کے بارے میں معلومات جمع کرنے میں مصروف ہیں۔

دوسری جانب چینی سرکاری میڈیا کے مطابق نیپال اور چین کی سرحد کے قریب تبت کے علاقے گیرونگ میں مٹی کے تودے گرنے سے 558 افراد لاپتا ہیں۔ ان میں 260 غیرملکی شہری شامل ہیں جبکہ 3 افراد ہلاک ہوئے ہیں۔

سیلاب اور مٹی کے تودوں سے سرحدی علاقے میں گھروں، سڑکوں اور بجلی کے منصوبوں کو بھی نقصان پہنچا ہے۔ نیپال اور چین میں امدادی ٹیمیں لاپتا افراد کی تلاش اور نقصانات کا جائزہ لینے میں مصروف ہیں۔