وزیراعظم شہباز شریف نے اسلام آباد مفاہمتی یادداشت کے تحت ہونے والے پہلے اعلیٰ سطحی اجلاس کی کامیاب تکمیل کا خیرمقدم کرتے ہوئے کہا ہے کہ حالیہ امریکہ ایران مذاکرات نے سفارتی عمل کو آگے بڑھانے میں اہم کردار ادا کیا ہے۔ سوئٹزرلینڈ میں ہونے والے اس اجلاس میں امریکہ، ایران، پاکستان اور قطر کے اعلیٰ حکام نے شرکت کی۔
وزیراعظم آفس کے مطابق مذاکرات مثبت اور تعمیری ماحول میں ہوئے اور کئی اہم امور پر پیش رفت حاصل کی گئی۔ اجلاس کے دوران فریقین نے آئندہ 60 روز میں ایک حتمی معاہدے تک پہنچنے کے لیے روڈ میپ پر اتفاق کیا جبکہ سیاسی نگرانی کے لیے ایک اعلیٰ سطحی کمیٹی قائم کرنے کا فیصلہ بھی کیا گیا۔
سوئٹزرلینڈ کے شہر برگن اسٹاک میں ہونے والے امریکہ ایران مذاکرات کے دوران کشیدگی میں کمی، سفارتی روابط کے فروغ اور مفاہمت کے مختلف پہلوؤں پر تبادلہ خیال کیا گیا۔ ماہرین پر مشتمل تکنیکی مذاکرات کا سلسلہ بھی جاری رکھنے پر اتفاق کیا گیا تاکہ طے شدہ نکات پر مزید پیش رفت ہو سکے۔
وزیراعظم شہباز شریف نے امریکہ اور ایران کی قیادت کو تعمیری مکالمے اور سفارتی عمل سے وابستگی پر سراہا۔ انہوں نے قطر اور سوئٹزرلینڈ سمیت ان تمام دوست ممالک کا شکریہ ادا کیا جنہوں نے مذاکرات کی کامیابی میں معاونت فراہم کی۔
Alhamdulillah, the First High-Level Committee Meeting under the framework of the Islamabad Memorandum of Understanding has concluded successfully in Bürgenstock, Switzerland.
The discussions were held in a positive and constructive atmosphere and yielded encouraging progress,… pic.twitter.com/uvA0SBKfvf
— Shehbaz Sharif (@CMShehbaz) June 22, 2026
وزیراعظم نے فیلڈ مارشل عاصم منیر کو خصوصی خراج تحسین پیش کرتے ہوئے کہا کہ ان کی انتھک کوششوں، عزم اور ثابت قدمی کے بغیر یہ پیش رفت ممکن نہ تھی۔ انہوں نے نائب وزیراعظم و وزیر خارجہ اسحاق ڈار، وزیر داخلہ محسن نقوی اور دفتر خارجہ کی ٹیم کی خدمات کو بھی سراہا۔
پاکستان اور قطر کی جانب سے جاری مشترکہ اعلامیے میں کہا گیا کہ امریکہ ایران مذاکرات کے نتیجے میں آئندہ رابطوں کے لیے ایک جامع فریم ورک طے پایا ہے۔ اعلامیے کے مطابق لبنان میں کشیدگی کے خاتمے کے لیے ایک طریقہ کار پر بھی اتفاق ہوا جبکہ تجارتی جہازوں کی محفوظ آمدورفت کے لیے رابطے کا نظام قائم کیا گیا۔
ایرانی حکام کے مطابق مذاکرات میں معاشی شعبے سے متعلق بھی اہم پیش رفت ہوئی، جس میں تیل اور پیٹروکیمیکل برآمدات کے لیے رعایتیں، بعض منجمد اثاثوں تک رسائی اور تعمیرِ نو و ترقیاتی منصوبوں کا آغاز شامل ہے۔ مبصرین کے نزدیک جاری امریکہ ایران مذاکرات خطے میں استحکام اور دیرپا امن کے لیے ایک اہم سنگ میل ثابت ہو سکتے ہیں۔
