یوم عاشور کے جلوس ملک بھر میں عقیدت و احترام کے ساتھ نکالے جا رہے ہیں جہاں حضرت امام حسینؓ اور شہدائے کربلا کی عظیم قربانی کو خراجِ عقیدت پیش کیا جا رہا ہے۔ مختلف شہروں میں مجالسِ عزا، شبیہ علم، تابوت اور ذوالجناح کے جلوس منعقد کیے جا رہے ہیں۔
یوم عاشور اسلامی تاریخ کا ایک اہم دن ہے جو واقعۂ کربلا کی یاد دلاتا ہے۔ چودہ سو سال قبل حضرت امام حسینؓ اور ان کے جانثار ساتھیوں نے حق، انصاف اور دین کی سربلندی کے لیے عظیم قربانی پیش کی، جسے آج بھی عقیدت کے ساتھ یاد کیا جاتا ہے۔
کراچی، لاہور، ملتان، پشاور، کوئٹہ، اسلام آباد، راولپنڈی، گلگت، اسکردو، مظفرآباد اور دیگر شہروں میں یوم عاشور کے جلوس اور مجالس منعقد ہو رہی ہیں، جن میں بڑی تعداد میں عزادار شریک ہیں۔
کراچی میں مرکزی جلوس نشتر پارک سے مجلس عزا کے بعد روانہ ہوا، جبکہ لاہور میں نثار حویلی اندرون موچی گیٹ سے نکلنے والا مرکزی جلوس اپنے روایتی راستوں سے ہوتا ہوا کربلا گامے شاہ کی جانب گامزن ہے۔
یوم عاشور کے موقع پر مختلف علاقوں میں نیاز اور سبیلوں کا بھی وسیع انتظام کیا گیا ہے۔ رضاکار عزاداروں اور شہریوں کو پانی اور دیگر اشیائے خور و نوش فراہم کر رہے ہیں تاکہ شہدائے کربلا کی قربانیوں کو یاد رکھا جا سکے۔
ملک بھر میں یوم عاشور کے جلوس کے دوران امن و امان برقرار رکھنے کے لیے سکیورٹی کے سخت انتظامات کیے گئے ہیں۔ جلوسوں کے راستوں پر قانون نافذ کرنے والے اداروں کی اضافی نفری تعینات ہے جبکہ ٹریفک کے خصوصی منصوبے بھی نافذ کیے گئے ہیں۔
ہر سال یوم عاشور مسلمانوں کو صبر، استقامت، حق گوئی اور قربانی کا درس دیتا ہے۔ یوم عاشور کے جلوس حضرت امام حسینؓ اور ان کے رفقا کی لازوال قربانی کو زندہ رکھنے اور ان کے پیغام کو نئی نسل تک پہنچانے کا اہم ذریعہ ہیں۔
