دیشا پٹانی کیون اسپیسی کے ساتھ اپنی پہلی ہالی ووڈ فلم Holiguards Saga – The Portal of Force کی ریلیز سے قبل ان کے ساتھ کام کرنے کے تجربے پر کھل کر بات کی۔ بھارتی اداکارہ نے کہا کہ یہ تجربہ ان کے لیے سیکھنے اور بطور فنکار مزید نکھرنے کا ایک اہم موقع ثابت ہوا۔

دیشا پٹانی نے کہا کہ کیون اسپیسی اداکاروں کو اپنے کردار کو آزادانہ انداز میں نبھانے کی بھرپور آزادی دیتے ہیں۔ ان کے مطابق وہ اداکاروں کو صرف اسکرپٹ تک محدود رکھنے کے بجائے انہیں مختلف انداز سے کردار کو سمجھنے اور پیش کرنے کی حوصلہ افزائی کرتے ہیں، جس سے اداکاری زیادہ حقیقی محسوس ہوتی ہے۔

انہوں نے بتایا کہ کیون اسپیسی اکثر اداکاروں سے کہتے تھے کہ وہ اپنے ذاتی تجربات اور جذبات کو کردار میں شامل کریں۔ وہ سوال کرتے تھے کہ اگر یہی صورتحال حقیقی زندگی میں پیش آئے تو ہر اداکار کس طرح ردعمل دے گا، تاکہ کردار زیادہ فطری انداز میں سامنے آئے۔

دیشا نے مزید بتایا کہ فلم بندی سے پہلے ہر صبح کیون اسپیسی پوری کاسٹ کے ساتھ بیٹھ کر منظر کی تفصیل پر بات کرتے تھے۔ ان کے مطابق یہ عمل کردار کو بہتر انداز میں سمجھنے میں مدد دیتا تھا اور انہوں نے اس طرح کی تیاری اپنے ماضی کے منصوبوں میں کم ہی دیکھی تھی۔

ہالی ووڈ میں کام حاصل کرنے کے حوالے سے دیشا نے کہا کہ صرف صلاحیت کافی نہیں ہوتی۔ ان کے مطابق آڈیشن، پیشہ ورانہ نمائندگی، درست مواقع، ویزا اور دیگر انتظامی معاملات بھی بین الاقوامی فلمی صنعت میں کامیابی کے لیے انتہائی اہم ہوتے ہیں۔

انہوں نے کہا کہ اگر کوئی فنکار بیرون ملک کام کرنا چاہتا ہے تو اسے متعلقہ ملک میں موجود رہنا چاہیے۔ اگرچہ آن لائن آڈیشن دیے جا سکتے ہیں، لیکن مستقل موجودگی سے ملاقاتوں، نیٹ ورکنگ اور نئے مواقع حاصل کرنے کے امکانات بڑھ جاتے ہیں۔

دیشا پٹانی کیون اسپیسی کے ساتھ اپنی ہالی ووڈ فلم میں نظر آنے سے قبل فلم آوارہ پن 2 میں عمران ہاشمی کے ساتھ بھی دکھائی دیں گی۔ ان کی بین الاقوامی فلم میں کیون اسپیسی کے علاوہ ڈولف لنڈگرین اور ٹائریس گبسن بھی اہم کردار ادا کر رہے ہیں۔