احسن اقبال نے آزاد کشمیر کے آئندہ انتخابات کے حوالے سے پاکستان پیپلز پارٹی کے چیئرمین بلاول بھٹو زرداری کے بیان پر ردعمل دیتے ہوئے کہا ہے کہ کشمیری عوام ترقی، کارکردگی اور بہتر طرزِ حکمرانی کو ترجیح دیں گے۔
نارووال میں مسلم لیگ (ن) کے ورکرز کنونشن سے خطاب کرتے ہوئے وفاقی وزیر برائے منصوبہ بندی احسن اقبال نے کہا کہ کشمیر کے عوام اپنے مستقبل کا فیصلہ خود کریں گے اور وہ ایسی ترقی چاہتے ہیں جو انہیں خوشحالی کی جانب لے جائے۔ انہوں نے کہا کہ کشمیری عوام ملک کے مختلف شہروں کی ترقی اور حکومتی کارکردگی سے بخوبی آگاہ ہیں۔
احسن اقبال نے بلاول بھٹو کو مخاطب کرتے ہوئے کہا کہ کشمیری عوام مسلم لیگ (ن) اور پاکستان پیپلز پارٹی، دونوں کی حکومتی کارکردگی کا موازنہ کر سکتے ہیں۔ ان کے مطابق عوام جانتے ہیں کہ کس دور میں ترقیاتی منصوبوں پر توجہ دی گئی اور کس دور میں بدعنوانی کے الزامات سامنے آئے۔
وفاقی وزیر نے دعویٰ کیا کہ مسلم لیگ (ن) کی ترقیاتی پالیسی کو ملک بھر میں پذیرائی حاصل ہے۔ ان کا کہنا تھا کہ عوام ترقی، انفراسٹرکچر، معاشی استحکام اور عوامی فلاح کے منصوبوں کی بنیاد پر ووٹ دیں گے، جبکہ مسلم لیگ (ن) پاکستان کی مضبوطی اور ترقی کی علامت ہے۔
یہ بیان ایسے وقت میں سامنے آیا ہے جب ایک روز قبل چیئرمین پاکستان پیپلز پارٹی بلاول بھٹو زرداری نے آزاد کشمیر میں انتخابی جلسے سے خطاب کرتے ہوئے دعویٰ کیا تھا کہ آئندہ انتخابات میں پیپلز پارٹی کامیابی حاصل کرے گی اور حکومت بنائے گی۔ انہوں نے کہا کہ اگر عوام نے موقع دیا تو وہ ہر قومی اور بین الاقوامی فورم پر کشمیر کا مقدمہ بھرپور انداز میں پیش کریں گے۔
کوٹلی میں جلسے سے خطاب کرتے ہوئے بلاول بھٹو نے کہا کہ وہ ہر نشست پر کامیابی حاصل کرنا چاہتے ہیں اور کشمیر کے مستقبل کا فیصلہ صرف کشمیری عوام کریں گے۔ ان کا مؤقف تھا کہ کسی ایک سیاسی جماعت یا فرد کے پاس کشمیر کے مستقبل کا اختیار نہیں بلکہ یہ حق عوام کے پاس ہے۔
