دنیا بھر میں ہر سال 27 جولائی کو سر اور گردن کے کینسر کا عالمی دن منایا جاتا ہے، جس کا مقصد اس خطرناک مرض کے بارے میں عوامی شعور اجاگر کرنا، ابتدائی تشخیص کی اہمیت کو اجاگر کرنا اور بیماری سے بچاؤ کے طریقوں سے آگاہ کرنا ہے۔
ماضی میں سر اور گردن کے کینسر کو زیادہ تر عمر رسیدہ افراد اور تمباکو نوشی کرنے والوں سے منسلک کیا جاتا تھا، تاہم حالیہ برسوں میں اس بیماری کے رجحان میں نمایاں تبدیلی دیکھنے میں آئی ہے۔ ماہرین کے مطابق اب نوجوان افراد میں بھی اس کینسر کے کیسز میں اضافہ ہو رہا ہے، حتیٰ کہ ایسے افراد بھی متاثر ہو رہے ہیں جنہوں نے کبھی تمباکو نوشی نہیں کی۔
طبی ماہرین کے مطابق سر اور گردن کے کینسر کی بڑی وجوہات میں تمباکو نوشی اور الکحل کا استعمال شامل ہیں، لیکن اس کے علاوہ ہیومن پیپیلوما وائرس (HPV) انفیکشن بھی اس بیماری کے خطرے کو بڑھا سکتا ہے۔ HPV ایک ایسا وائرس ہے جو بعض اقسام کے کینسر کا سبب بن سکتا ہے۔
سر اور گردن کے کینسر میں منہ، حلق، ٹانسلز اور زبان کے کینسر شامل ہوتے ہیں۔ ماہرین کا کہنا ہے کہ تمباکو سے پیدا ہونے والے کینسر اور HPV سے متعلق کینسر کے درمیان فرق کو سمجھنا ضروری ہے، کیونکہ بیماری کی بروقت تشخیص سے علاج کے نتائج بہتر ہونے کے امکانات بڑھ جاتے ہیں۔
ماہرین کے مطابق HPV ویکسین سر اور گردن کے کینسر کی بعض اقسام سے تحفظ فراہم کرنے میں مددگار ثابت ہوسکتی ہے۔ اگر یہ ویکسین 9 سے 14 سال کی عمر کے بچوں کو دی جائے تو مستقبل میں HPV سے متعلق بیماریوں کے خطرے کو کم کیا جا سکتا ہے۔
اس کے علاوہ تمباکو نوشی سے مکمل پرہیز، الکحل کے استعمال سے دوری، منہ کی صفائی کا خیال رکھنا اور HPV وائرس کے پھیلاؤ سے بچنے کے لیے احتیاطی تدابیر اختیار کرنا بھی اس کینسر کے خطرے کو کم کرنے میں مددگار ہو سکتے ہیں۔ ماہرین خاص طور پر تمباکو اور الکحل استعمال کرنے والے افراد کو باقاعدگی سے اسکریننگ کروانے کا مشورہ دیتے ہیں۔
سر اور گردن کے کینسر کی عام علامات میں منہ یا مسوڑھوں پر سرخ یا سفید دھبے، ایسے زخم یا چھالے جو دو ہفتوں میں ٹھیک نہ ہوں، گردن یا کندھوں پر بغیر درد کے گلٹی بننا، آواز میں تبدیلی، دو ہفتوں سے زائد گلے کی خرابی، کھانا چبانے یا نگلنے میں مشکل اور بغیر وجہ وزن کم ہونا شامل ہیں۔
ماہرین کے مطابق ان علامات کو نظر انداز نہیں کرنا چاہیے، کیونکہ ابتدائی مرحلے میں تشخیص ہونے سے علاج کے کامیاب ہونے کے امکانات نمایاں طور پر بڑھ سکتے ہیں۔ سر اور گردن کے کینسر کے بارے میں آگاہی اور بروقت طبی معائنہ اس بیماری کے خلاف مؤثر تحفظ فراہم کر سکتا ہے۔
