عالمی منڈی میں مسلسل اضافے کے بعد خام تیل کی قیمتوں میں ایک بار پھر کمی دیکھنے میں آئی ہے۔ جمعرات کو ہونے والی تازہ کاروباری سرگرمی میں تیل کی قیمتیں ایک ڈالر سے زائد نیچے آگئیں، جس کی بڑی وجہ 2026 میں عالمی سطح پر تیل کی طلب کے حوالے سے کمزور پیش گوئی قرار دی جارہی ہے۔
عالمی مارکیٹ کے اہم بینچ مارک برینٹ خام تیل کی قیمت 1.29 ڈالر کمی کے بعد 87.69 ڈالر فی بیرل ہوگئی۔ حالیہ دنوں میں تیل کی قیمتوں میں مسلسل تیزی دیکھی گئی تھی، تاہم طلب کے نئے اندازوں نے سرمایہ کاروں کے محتاط رویے کو بڑھا دیا ہے۔
دوسری جانب امریکی خام تیل ویسٹ ٹیکساس انٹرمیڈیٹ، جسے WTI بھی کہا جاتا ہے، کی قیمت بھی 1.30 ڈالر کم ہوکر 81.97 ڈالر فی بیرل پر آگئی۔ یوں برینٹ اور امریکی خام تیل دونوں ہی دباؤ کا شکار نظر آئے۔
خام تیل کی قیمتوں میں حالیہ کمی کی ایک اہم وجہ عالمی طلب کے اندازوں میں تبدیلی ہے۔ اوپیک نے 2026 کے دوران عالمی تیل کی طلب میں اضافے کی پیش گوئی کم کرکے 5 لاکھ 80 ہزار بیرل یومیہ کردی ہے۔ یہ اوپیک کی جانب سے مسلسل چوتھی مرتبہ طلب کی پیش گوئی میں کمی ہے۔
مشرق وسطیٰ کی صورتحال بھی عالمی تیل مارکیٹ کے لیے اہم بنی ہوئی ہے۔ ایران سے متعلق جاری جنگ اور توانائی کی ترسیل میں رکاوٹوں نے مارکیٹ میں غیر یقینی صورتحال پیدا کی ہے۔ آبنائے ہرمز اور باب المندب جیسے اہم سمندری راستوں میں پیدا ہونے والے خطرات بھی تیل کی سپلائی پر اثر انداز ہوسکتے ہیں۔
عالمی تیل کی طلب کے بارے میں بڑے اداروں کی پیش گوئیوں میں بھی واضح فرق سامنے آیا ہے۔ اوپیک اگرچہ 2026 میں طلب میں معمولی اضافے کی توقع رکھتا ہے، تاہم انٹرنیشنل انرجی ایجنسی (IEA) نے عالمی کھپت میں تقریباً 16 لاکھ بیرل یومیہ کمی کی پیش گوئی کی ہے۔
