کراچی: نیشنل ایمرجنسی آپریشن سینٹر (نیشنل ای او سی) نے کراچی کے 6 اضلاع کے ماحولیاتی نمونوں میں پولیو وائرس کی موجودگی کی تصدیق کردی ہے۔
نیشنل ای او سی کے مطابق کراچی کے وسطی، شرقی، کیماڑی، ملیر، جنوبی اور غربی اضلاع سے حاصل کیے گئے ماحولیاتی نمونوں میں پولیو وائرس پایا گیا۔ یہ نتائج شہر کے مختلف علاقوں میں وائرس کی گردش کی نشاندہی کرتے ہیں۔
حکام کے مطابق جون کے دوران کراچی کے ان چھ اضلاع کے ماحولیاتی نمونوں میں پولیو وائرس کا سراغ نہیں ملا تھا، تاہم حالیہ نتائج میں وائرس کی دوبارہ موجودگی سامنے آئی ہے۔
نیشنل ای او سی کے مطابق سندھ کے ضلع کشمور سے بھی جولائی میں حاصل کیے گئے ماحولیاتی نمونے میں پولیو وائرس کی تصدیق ہوئی تھی۔ حکام ملک کے مختلف علاقوں میں وائرس کی موجودگی پر مسلسل نگرانی کر رہے ہیں۔
دوسری جانب بلوچستان میں بھی پولیو وائرس کے ماحولیاتی شواہد سامنے آئے ہیں۔ نیشنل ای او سی کے مطابق چمن، ڈیرہ بگٹی اور کوئٹہ کے ماحولیاتی نمونوں میں وائرس کی موجودگی کی تصدیق ہوئی ہے۔
خیبرپختونخوا میں بنوں اور پشاور کے ماحولیاتی نمونوں میں بھی پولیو وائرس پایا گیا۔ پنجاب میں راولپنڈی سے جولائی کے دوران حاصل کیے گئے ایک ماحولیاتی نمونے میں وائرس کی موجودگی رپورٹ ہوئی تھی۔
ماحولیاتی نمونوں میں پولیو وائرس کی موجودگی اس بات کی نشاندہی کرتی ہے کہ وائرس مختلف علاقوں میں گردش کر رہا ہے، اگرچہ صرف ماحولیاتی نمونے کی مثبت رپورٹ کسی فرد میں پولیو بیماری کی تصدیق نہیں کرتی۔
