آزاد کشمیر انتخابات کا دوسرا مرحلہ 21 نشستوں پر پولنگ کے ساتھ شروع ہو رہا ہے۔ آزاد جموں و کشمیر قانون ساز اسمبلی کے انتخابات کے لیے الیکشن کمیشن نے تمام انتظامات مکمل کرلیے ہیں، جبکہ ووٹنگ مظفرآباد ڈویژن اور پاکستان میں مقیم کشمیری مہاجرین کی نشستوں پر ہوگی۔

پولنگ صبح 8 بجے سے شام 5 بجے تک جاری رہے گی۔ مظفرآباد ڈویژن کی نو نشستوں اور مہاجرین کی 12 مخصوص نشستوں کے لیے ووٹرز اپنا حق رائے دہی استعمال کریں گے۔ الیکشن عملہ اور انتخابی سامان پولنگ اسٹیشنز تک پہنچا دیا گیا ہے۔

مظفرآباد ڈویژن کی نو نشستوں پر مجموعی طور پر 208 امیدوار میدان میں ہیں، جبکہ 8 لاکھ 90 ہزار سے زائد رجسٹرڈ ووٹرز ووٹ ڈالنے کے اہل ہیں۔ اس ڈویژن میں مظفرآباد، نیلم اور جہلم ویلی کے اضلاع شامل ہیں جہاں بڑی تعداد میں پولنگ بوتھ قائم کیے گئے ہیں۔

مہاجرین کی 12 نشستوں پر 143 امیدوار انتخابات میں حصہ لے رہے ہیں۔ ان نشستوں کے لیے پاکستان میں مقیم کشمیری مہاجرین ووٹ ڈالیں گے، جن میں جموں اور وادی کی نمائندگی کرنے والی نشستیں شامل ہیں۔

انتخابات میں پاکستان مسلم لیگ (ن)، پاکستان پیپلز پارٹی، استحکام پاکستان پارٹی، جماعت اسلامی اور آزاد امیدواروں کے درمیان سخت مقابلے کی توقع ہے۔ سیاسی جماعتوں نے اسمبلی میں برتری حاصل کرنے کے لیے بھرپور انتخابی مہم چلائی ہے۔

دوسرے مرحلے کی پولنگ کے لیے سیکیورٹی انتظامات مزید سخت کیے گئے ہیں۔ بعض حلقوں کو انتہائی حساس قرار دیا گیا ہے جبکہ 4 ہزار سے زائد سیکیورٹی اہلکار امن و امان برقرار رکھنے کے لیے تعینات کیے جائیں گے۔

پہلے مرحلے میں میرپور ڈویژن کے نتائج کے بعد مسلم لیگ (ن) نے ابتدائی برتری حاصل کی تھی اور 13 میں سے 9 نشستیں جیتی تھیں۔ اب آزاد کشمیر انتخابات کا دوسرا مرحلہ مکمل ہونے کے بعد سیاسی جماعتوں کی نظریں آخری مرحلے اور حکومت سازی کے امکانات پر مرکوز ہوں گی۔