چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر نے بلوچستان کا دورہ کیا، جہاں انہیں صوبے کی موجودہ سکیورٹی صورتحال اور پاک فوج کی آپریشنل تیاریوں کے حوالے سے تفصیلی بریفنگ دی گئی۔ اس موقع پر انہوں نے مشکل آپریشنل حالات میں فرائض انجام دینے والے فوجی افسران اور جوانوں کے جذبے، پیشہ ورانہ صلاحیتوں اور عزم کو سراہا۔
پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل عاصم منیر نے تربت میں شہداء کی یادگار پر حاضری دی اور پھولوں کی چادر چڑھانے کے بعد فاتحہ خوانی کی۔ انہوں نے وطن کے دفاع کے لیے اپنی جانوں کا نذرانہ پیش کرنے والے شہداء کی قربانیوں کو خراج عقیدت پیش کیا۔
دورے کے دوران آرمی چیف کو بلوچستان میں سکیورٹی کی مجموعی صورتحال، جاری آپریشنز اور فوج کی عملی تیاریوں پر بریفنگ دی گئی۔ انہیں بیرونی سرپرستی میں ہونے والی دہشت گردی کے خلاف جاری کارروائیوں اور حاصل ہونے والی کامیابیوں سے بھی آگاہ کیا گیا۔
آئی ایس پی آر کے مطابق فیلڈ مارشل کو بلوچستان میں جاری مختلف سماجی اور اقتصادی ترقیاتی منصوبوں کی پیشرفت کے بارے میں بھی بتایا گیا۔ ان منصوبوں کا مقصد صوبے میں ترقی کے عمل کو آگے بڑھانا اور عوام کے لیے بہتر معاشی و سماجی مواقع پیدا کرنا ہے۔
جوانوں اور افسران سے خطاب کرتے ہوئے فیلڈ مارشل عاصم منیر نے ان کی اعلیٰ آپریشنل تیاری، پیشہ ورانہ مہارت اور مادر وطن کے دفاع کے لیے غیرمتزلزل عزم کو سراہا۔ انہوں نے مشکل جغرافیائی اور آپریشنل حالات میں ذمہ داریاں نبھانے والے اہلکاروں کی خدمات کو بھی قابل تحسین قرار دیا۔
فیلڈ مارشل نے بلوچستان میں امن و استحکام کے قیام اور پائیدار ترقی کے لیے پاک فوج کے عزم کا اعادہ کیا۔ انہوں نے اس بات پر زور دیا کہ صوبے میں ترقی، خوشحالی اور سکیورٹی کے فروغ کے لیے کوششیں جاری رہیں گی۔