بھارت اور متحدہ عرب امارات کے درمیان دفاع، توانائی اور سرمایہ کاری کے شعبوں میں کئی اہم معاہدوں پر دستخط کیے گئے ہیں۔ یہ معاہدے بھارتی وزیراعظم نریندر مودی کے دورہ یو اے ای کے دوران طے پائے۔
بھارتی حکومت کی جانب سے جاری بیان کے مطابق دونوں ممالک نے اسٹرٹیجک دفاعی تعاون کو مزید مضبوط بنانے پر اتفاق کیا ہے۔ اس سلسلے میں دفاعی شراکت داری اور سیکیورٹی تعاون سے متعلق اہم معاہدوں پر دستخط کیے گئے۔
بیان میں کہا گیا کہ دونوں ممالک نے تیل ذخائر اور توانائی کے شعبے میں بھی تعاون بڑھانے کا فیصلہ کیا ہے۔ اس کے علاوہ مائع پیٹرولیم گیس (ایل پی جی) کی فراہمی سے متعلق بھی ایک اہم معاہدہ طے پایا، جس سے توانائی کے شعبے میں دوطرفہ تعلقات مزید مستحکم ہونے کی توقع ہے۔
دورے کے دوران سرمایہ کاری کے شعبے میں بھی بڑی پیش رفت سامنے آئی۔ یو اے ای کی جانب سے بھارتی انفرااسٹرکچر، RBL Bank اور Suman Capital میں مجموعی طور پر 5 ارب ڈالر کی سرمایہ کاری کا اعلان کیا گیا۔
ماہرین کے مطابق یہ معاہدے نہ صرف دونوں ممالک کے معاشی تعلقات کو نئی جہت دیں گے بلکہ خطے میں تجارتی اور اسٹرٹیجک تعاون کو بھی فروغ ملے گا۔ حالیہ برسوں میں بھارت اور یو اے ای کے درمیان اقتصادی شراکت داری میں نمایاں اضافہ دیکھا گیا ہے۔
نریندر مودی کے اس دورے کو دونوں ممالک کے تعلقات کے لیے اہم پیش رفت قرار دیا جا رہا ہے، خاص طور پر ایسے وقت میں جب خلیجی ممالک اور بھارت کے درمیان تجارت اور سرمایہ کاری کے روابط تیزی سے مضبوط ہو رہے ہیں۔
