ناروے کے شہر ڈرامن میں لگنے والی خوفناک آگ نے بڑے پیمانے پر تباہی مچا دی، جہاں ناروے میں آگ کے باعث 100 سے زائد مکانات جل کر خاکستر ہو گئے۔ آگ تیزی سے پھیلنے کے بعد سینکڑوں افراد کو احتیاطی طور پر محفوظ مقامات پر منتقل کر دیا گیا، جبکہ امدادی ادارے مسلسل صورتحال پر قابو پانے کی کوشش کر رہے ہیں۔
غیر ملکی میڈیا رپورٹس کے مطابق آگ اچانک بھڑک اٹھی اور تیز ہواؤں کے باعث دیکھتے ہی دیکھتے رہائشی علاقوں سے قریبی جنگلات تک پھیل گئی۔ تیز رفتار ہواؤں نے شعلوں کو مزید شدت دی، جس سے آگ پر قابو پانے کا عمل مشکل ہو گیا۔
اطلاع ملتے ہی فائر بریگیڈ کی ٹیمیں جائے وقوعہ پر پہنچ گئیں اور آگ بجھانے کا آپریشن شروع کر دیا۔ امدادی کارروائیوں میں 60 سے زائد رضاکار بھی حصہ لے رہے ہیں، جبکہ ہیلی کاپٹروں کے ذریعے فضائی راستے سے پانی پھینک کر آگ کو محدود کرنے کی کوشش کی جا رہی ہے۔
View this post on Instagram
ریسکیو حکام کے مطابق متاثرہ علاقوں سے سینکڑوں افراد کو بروقت محفوظ مقامات پر منتقل کر دیا گیا ہے تاکہ کسی بھی جانی نقصان سے بچا جا سکے۔ حکام مسلسل متاثرہ علاقوں کی نگرانی کر رہے ہیں اور شہریوں کو احتیاطی تدابیر اختیار کرنے کی ہدایت دی گئی ہے۔
ابتدائی اطلاعات کے مطابق اس بڑے آتش زدگی کے واقعے میں تاحال کسی شخص کے ہلاک ہونے کی اطلاع نہیں ملی، تاہم متعدد مکانات مکمل طور پر تباہ ہو چکے ہیں۔ امدادی ٹیمیں آگ پر مکمل قابو پانے کے لیے دن رات کام کر رہی ہیں۔
حکام کا کہنا ہے کہ آگ لگنے کی اصل وجہ ابھی تک معلوم نہیں ہو سکی۔ واقعے کی تحقیقات شروع کر دی گئی ہیں، جبکہ آگ پر مکمل قابو پانے کے بعد نقصانات کا تفصیلی جائزہ لیا جائے گا۔ ماہرین کا کہنا ہے کہ تیز ہواؤں اور خشک موسم نے آگ کو تیزی سے پھیلنے میں اہم کردار ادا کیا۔
