پاکستان اور کرغزستان نے اپنے دوطرفہ تعلقات کو پاکستان اور کرغزستان اسٹریٹجک شراکت داری کی سطح تک لے جانے پر اتفاق کیا ہے۔ یہ پیش رفت صدر آصف علی زرداری کے کرغزستان کے دورے کے دوران صدر صدر جپاروف کے ساتھ ملاقات کے بعد جاری مشترکہ اعلامیے میں سامنے آئی، جس میں تجارت، سرمایہ کاری، توانائی، علاقائی روابط اور سلامتی کے شعبوں میں تعاون بڑھانے کے عزم کا اظہار کیا گیا۔
دونوں رہنماؤں نے توانائی، زراعت، کان کنی، ٹیکسٹائل، حلال صنعت اور دواسازی سمیت مختلف شعبوں میں تعاون کو مزید فروغ دینے پر اتفاق کیا۔ اس کے ساتھ ساتھ مشترکہ سرمایہ کاری کی حوصلہ افزائی اور باہمی اقتصادی روابط کو وسعت دینے کے عزم کا بھی اعادہ کیا گیا۔
ملاقات میں CASA-1000 توانائی منصوبے پر پیش رفت تیز کرنے پر بھی اتفاق ہوا، جس کا مقصد وسطی اور جنوبی ایشیا کے درمیان بجلی کی ترسیل کو بہتر بنانا ہے۔ پاکستان نے اس موقع پر وسطی ایشیائی ممالک کو اپنی بندرگاہوں کے ذریعے عالمی منڈیوں تک رسائی فراہم کرنے کی پیشکش بھی دہرائی۔
مشترکہ اعلامیے میں علاقائی روابط کو مضبوط بنانے اور باہمی تجارت میں اضافے کو مستقبل کی اقتصادی ترقی کے لیے اہم قرار دیا گیا۔ دونوں ممالک نے اس بات پر زور دیا کہ بہتر رابطے اور تعاون سے خطے میں معاشی سرگرمیوں کو مزید فروغ ملے گا۔
صدر آصف علی زرداری اور صدر صدر جپاروف نے دہشت گردی اور انتہا پسندی کے خلاف مشترکہ کوششیں جاری رکھنے کے عزم کا بھی اظہار کیا۔ دونوں رہنماؤں نے اقوام متحدہ، شنگھائی تعاون تنظیم اور اسلامی تعاون تنظیم سمیت مختلف عالمی فورمز پر تعاون مزید مضبوط بنانے پر اتفاق کیا۔
کرغزستان کے صدر نے اقوام متحدہ میں پاکستان کی امن کوششوں اور مشرق وسطیٰ میں اس کے سفارتی کردار کو سراہا۔ انہوں نے اسلام آباد مفاہمتی یادداشت کا بھی خیرمقدم کیا، جس کا مقصد خطے میں دیرپا امن کے فروغ میں مدد فراہم کرنا ہے۔
دورے کے دوران صدر جپاروف نے صدر آصف علی زرداری کو اگست 2026 میں کرغزستان میں ہونے والے ورلڈ نومیڈ گیمز میں شرکت کی دعوت دی، جسے پاکستانی صدر نے قبول کر لیا۔ انہوں نے اعلان کیا کہ پاکستان ایک سرکاری وفد اور کھیلوں کی ٹیمیں بھیجے گا، جبکہ صدر زرداری نے کرغز صدر کو پاکستان کے دورے کی دعوت بھی دی، جسے انہوں نے قبول کر لیا۔
