وزیراعظم اپنا گھر پروگرام کا باقاعدہ آغاز کر دیا گیا ہے جس کا مقصد کم اور متوسط آمدنی والے افراد کو سستے اور آسان اقساط پر گھر یا پلاٹ فراہم کرنا ہے۔ یہ منصوبہ ملک میں رہائشی سہولتوں کو بڑھانے کے لیے ایک بڑا اقدام قرار دیا جا رہا ہے۔

وزیراعظم اپنا گھر پروگرام کے تحت شہری 10 مرلہ گھر یا پلاٹ آسان اقساط پر حاصل کر سکیں گے۔ اس اسکیم میں 25 لاکھ روپے سے لے کر 1 کروڑ روپے تک کا قرض فراہم کیا جائے گا تاکہ زیادہ سے زیادہ لوگ اس سے فائدہ اٹھا سکیں۔

قرض کی مدت 20 سال مقرر کی گئی ہے۔ پہلے 10 سال کے دوران 5 فیصد فکسڈ مارک اپ لاگو ہوگا جبکہ باقی 10 سالوں میں عام مارک اپ لیا جائے گا۔ یہ سہولت ابتدائی مالی دباؤ کو کم کرنے کے لیے دی گئی ہے۔

اس اسکیم کے تحت ماہانہ اقساط بھی واضح کر دی گئی ہیں۔ 25 لاکھ روپے کے قرض پر ماہانہ قسط تقریباً 16 ہزار 499 روپے ہوگی، جبکہ 50 لاکھ، 75 لاکھ اور 1 کروڑ روپے کے قرض پر بالترتیب 32 ہزار 997، 49 ہزار 497 اور 65 ہزار 996 روپے قسط ہوگی۔

حکام کے مطابق درخواست دہندہ کے نام پر پہلے سے کوئی بڑا قرض یا واجبات نہیں ہونے چاہئیں۔ اس اسکیم میں 90 فیصد فنانسنگ حکومت فراہم کرے گی جبکہ 10 فیصد رقم شہری کو خود ادا کرنا ہوگی۔

وزیراعظم اپنا گھر پروگرام کے تحت قرض کی فراہمی اسلامی بینکوں، کمرشل بینکوں، مائیکروفنانس اداروں اور ہاؤس بلڈنگ فنانس کمپنیوں کے ذریعے کی جائے گی۔ درخواست کے لیے کوئی پیشگی فیس نہیں رکھی گئی۔

اس منصوبے کی نگرانی اسٹیٹ بینک آف پاکستان اور پاکستان ہاؤسنگ اتھارٹی فاؤنڈیشن کریں گے۔ درخواست کا پورا عمل آن لائن ہوگا اور ایک ماہ کے اندر منظوری دی جائے گی۔ حکومت کے مطابق یہ منصوبہ رہائشی بحران کم کرنے اور عوام کو گھر فراہم کرنے میں اہم کردار ادا کرے گا۔