محکمہ موسمیات نے سندھ کے مختلف اضلاع کے لیے بارشوں کی تازہ پیشگوئی جاری کرتے ہوئے کہا ہے کہ آج اور کل کے دوران صوبے کے کئی علاقوں میں وقفے وقفے سے بارش متوقع ہے۔ ادارے کے مطابق جنوب مغربی راجستھان اور اس سے ملحقہ علاقوں میں کم دباؤ کا نظام موجود ہے، تاہم آئندہ روز اس کی شدت میں کمی آنے کا امکان ظاہر کیا گیا ہے۔
محکمہ موسمیات کے مطابق مون سون کی طاقتور ہوائیں ملک کے جنوبی اور وسطی علاقوں میں داخل ہو رہی ہیں، جس کے باعث سندھ کے مختلف اضلاع میں بارش کا سلسلہ جاری رہ سکتا ہے۔ پیشگوئی کے مطابق تھرپارکر، عمرکوٹ، میرپورخاص اور گرد و نواح میں بعض مقامات پر موسلا دھار بارش ہونے کا امکان ہے، جس سے نشیبی علاقوں میں پانی جمع ہونے کی صورتحال پیدا ہو سکتی ہے۔
ادارے نے بتایا کہ ٹنڈو محمد خان، ٹنڈو الہ یار اور حیدرآباد میں گرج چمک کے ساتھ بارش متوقع ہے، جبکہ سانگھڑ، شہید بینظیر آباد، کشمور اور جیکب آباد میں بھی بارش اور گرج چمک کی پیشگوئی کی گئی ہے۔ اسی طرح شکارپور، سکھر، خیرپور اور نوشہرو فیروز میں بھی مختلف اوقات میں بارش ہونے کا امکان موجود ہے۔
کراچی کے حوالے سے محکمہ موسمیات کا کہنا ہے کہ آئندہ تین روز کے دوران شہر کا موسم مرطوب اور مطلع ابر آلود رہنے کی توقع ہے۔ آج شہر کے مختلف علاقوں میں بوندا باندی یا ہلکی بارش ہو سکتی ہے، جبکہ اگلے تین روز تک وقفے وقفے سے بوندا باندی کا امکان برقرار رہے گا۔
مزید بتایا گیا ہے کہ پیر اور منگل کے دوران کراچی میں وقفے وقفے سے تیز ہوائیں بھی چل سکتی ہیں، جبکہ شہر کے مضافاتی علاقوں میں گرج چمک کے ساتھ بارش کا امکان موجود ہے۔ محکمہ موسمیات نے شہریوں کو مشورہ دیا ہے کہ موسمی صورتحال سے باخبر رہیں، غیر ضروری سفر سے گریز کریں اور نشیبی علاقوں میں احتیاطی تدابیر اختیار کریں، تاکہ ممکنہ مشکلات سے بچا جا سکے۔
