اسلام آباد: وزیر اطلاعات عطا تارڑ نے کہا ہے کہ سابق وزیراعظم عمران خان کو اسپتال میں طبی معائنے کے بعد ڈاکٹروں نے صحت مند قرار دیا ہے۔

سوشل میڈیا پلیٹ فارم ایکس پر جاری اپنے بیان میں عطا تارڑ نے بتایا کہ عمران خان کو 20 اور 21 اگست کی درمیانی شب حفاظتی انتظامات کے تحت اسپتال منتقل کیا گیا۔ ان کے مطابق اسپتال لے جانے کا مقصد عمران خان کا تفصیلی طبی معائنہ کرانا تھا۔

وزیر اطلاعات کے مطابق عمران خان کا معائنہ ماہر ڈاکٹروں کی ٹیم نے کیا، جس میں ماہر امراض چشم، ماہر امراض قلب اور فزیشن بھی شامل تھے۔ ڈاکٹروں نے ان کی مجموعی صحت کا جائزہ لیا۔

عطا تارڑ نے دعویٰ کیا کہ طبی معائنے کے بعد ڈاکٹروں نے عمران خان کو طبی طور پر صحت مند قرار دیا۔ ان کے مطابق عمران خان کی ہمشیرہ عظمیٰ خان بھی طبی معائنے اور علاج کے تمام مراحل کے دوران موجود رہیں۔

وزیر اطلاعات نے مزید بتایا کہ طبی معائنہ مکمل ہونے کے بعد عمران خان کو 21 اگست کی صبح تقریباً 5 بجے دوبارہ اڈیالہ جیل منتقل کر دیا گیا۔ ان کے مطابق یہ منتقلی ڈاکٹروں کی جانب سے معائنہ مکمل کیے جانے کے بعد عمل میں آئی۔

عمران خان کی صحت کے حوالے سے یہ پیش رفت ایسے وقت میں سامنے آئی ہے جب ان کی طبی حالت پر سیاسی حلقوں، اہل خانہ اور ان کے حامیوں کی جانب سے مسلسل توجہ دی جا رہی ہے۔ ان کی صحت سے متعلق معلومات پہلے بھی سیاسی بحث کا موضوع بنتی رہی ہیں۔