بلوچستان کے ضلع قلات میں انٹیلی جنس بیسڈ آپریشن کے دوران 12 دہشتگرد ہلاک ہوگئے۔ پاک فوج کے شعبہ تعلقات عامہ آئی ایس پی آر کے مطابق قلات آپریشن دہشتگردوں کی موجودگی کی خفیہ اطلاع پر کیا گیا۔

آئی ایس پی آر کے مطابق سیکیورٹی فورسز نے بدھ کے روز دہشتگردوں کی موجودگی کی اطلاع ملنے پر کارروائی کی۔ فوج کے میڈیا ونگ نے ہلاک دہشتگردوں کو فتنۃ الہندوستان سے وابستہ قرار دیا ہے۔

بیان کے مطابق فورسز نے دہشتگردوں کے ٹھکانے کی نشاندہی کی اور اس کی نگرانی کی۔ بعد ازاں فوری کارروائی کرتے ہوئے ٹھکانے کو تباہ کردیا گیا۔ قلات آپریشن میں 12 دہشتگرد مارے گئے۔

آئی ایس پی آر نے بتایا کہ کارروائی کے دوران بڑی تعداد میں گولہ بارود اور دیسی ساختہ بم بھی برآمد ہوئے۔ سیکیورٹی فورسز نے برآمد ہونے والے دھماکا خیز مواد کو موقع پر ہی تباہ کردیا۔

قلات آپریشن ایسے وقت میں کیا گیا ہے جب بلوچستان میں حالیہ دنوں کے دوران دہشتگردی کے واقعات میں اضافہ دیکھا گیا ہے۔ 31 اگست اور یکم ستمبر کی درمیانی شب دہشتگردوں نے پشین کے علاقے زیارت کراس میں کسٹمز ہاؤس پر حملہ کیا تھا۔

سیکیورٹی فورسز نے کارروائی کرتے ہوئے حملہ آوروں میں سے 10 دہشتگردوں کو ہلاک کردیا تھا۔ فائرنگ کے تبادلے میں 6 افراد جاں بحق ہوئے، جن میں 2 سیکیورٹی اہلکار بھی شامل تھے۔ 31 اگست کو کوئٹہ، تفتان شاہراہ پر غیر قانونی چیک پوسٹ قائم کرکے بھتہ لینے والے 11 دہشتگرد بھی مارے گئے تھے۔

آئی ایس پی آر کے مطابق سیکیورٹی فورسز اور قانون نافذ کرنے والے اداروں کی دہشتگردی کے خلاف کارروائیاں جاری رہیں گی۔ فوج نے کہا ہے کہ عزمِ استحکام کے تحت کارروائیاں مکمل رفتار سے جاری رہیں گی۔ تازہ قلات آپریشن بلوچستان میں دہشتگردی کے خلاف جاری کوششوں کا حصہ ہے۔