آبنائے ہرمز بارودی سرنگوں کی صفائی آپریشن کے حوالے سے جرمنی نے اس میں ممکنہ شمولیت کا اعلان کیا ہے تاکہ دنیا کے اہم ترین بحری راستے کی حفاظت یقینی بنائی جا سکے۔

جرمن وزیر دفاع بورس پسٹوریئس نے ایک انٹرویو میں کہا کہ اگر بین الاقوامی مشن تشکیل دیا گیا تو جرمنی اس میں شامل ہوگا اور آبنائے ہرمز میں بحری سلامتی کے لیے کردار ادا کرے گا۔

انہوں نے واضح کیا کہ کسی بھی فوجی تعیناتی کے لیے پارلیمنٹ کی منظوری لازمی ہوگی، اس کے بغیر جرمن افواج کو خطے میں نہیں بھیجا جا سکتا۔

تیاری کے طور پر جرمنی نے کچھ بحری افواج کو بحیرہ روم میں تعینات کرنے کا فیصلہ کیا ہے تاکہ منظوری کے بعد فوری طور پر کارروائی شروع کی جا سکے۔

آبنائے ہرمز بارودی سرنگوں کی صفائی آپریشن کی ضرورت خطے میں بڑھتی ہوئی بحری کشیدگی کے باعث محسوس کی جا رہی ہے۔ متعدد ممالک اس ممکنہ مشن میں شامل ہونے میں دلچسپی ظاہر کر چکے ہیں۔

ذرائع کے مطابق اگر امریکا اور ایران کے درمیان سفارتی پیش رفت ہوتی ہے تو بین الاقوامی تعاون میں مزید اضافہ متوقع ہے۔

آبنائے ہرمز دنیا کی توانائی ترسیل کا ایک اہم راستہ ہے اور اس میں کسی بھی رکاوٹ سے عالمی منڈی متاثر ہو سکتی ہے۔