نئے مالی سال 2026-27 کے آغاز پر پاکستان کی برآمدات میں نمایاں اضافہ ریکارڈ کیا گیا ہے، جو ملکی معیشت کے لیے ایک مثبت اشارہ سمجھا جا رہا ہے۔ تازہ سرکاری اعداد و شمار کے مطابق جولائی 2026 میں برآمدی شعبے نے گزشتہ ماہ کے مقابلے میں نمایاں بہتری دکھائی۔

ادارہ شماریات کی جانب سے جاری کردہ تجارتی اعداد و شمار کے مطابق جولائی 2026 میں پاکستان کی برآمدات 2 ارب 93 کروڑ 90 لاکھ ڈالر رہیں۔ اس سے قبل جون 2026 میں برآمدات کا حجم 2 ارب 24 کروڑ 20 لاکھ ڈالر ریکارڈ کیا گیا تھا۔

اعداد و شمار کے مطابق جولائی میں ماہانہ بنیادوں پر برآمدات میں 31.09 فیصد اضافہ ہوا، جو نئے مالی سال کے پہلے ہی مہینے میں بیرونی تجارت کے لیے حوصلہ افزا پیش رفت قرار دیا جا رہا ہے۔

اسی طرح سالانہ بنیادوں پر برآمدات میں 9.54 فیصد اضافہ ریکارڈ کیا گیا، جس سے ظاہر ہوتا ہے کہ عالمی اور علاقائی چیلنجز کے باوجود پاکستانی مصنوعات کی بیرونی منڈیوں میں طلب برقرار رہی۔

ماہرین کا کہنا ہے کہ خطے میں غیر یقینی صورتحال کے باوجود برآمدات میں اضافہ ملکی صنعتی سرگرمیوں، ٹیکسٹائل اور دیگر برآمدی شعبوں کی بہتر کارکردگی کا نتیجہ ہو سکتا ہے۔ اگر یہی رجحان برقرار رہا تو آنے والے مہینوں میں زرمبادلہ کے ذخائر اور اقتصادی استحکام پر بھی مثبت اثرات مرتب ہو سکتے ہیں۔

حکومت کی جانب سے برآمدات میں اضافے کے لیے مختلف مراعات اور پالیسی اقدامات بھی متعارف کرائے گئے ہیں۔ معاشی ماہرین کا خیال ہے کہ برآمدات کا مسلسل بڑھنا نہ صرف تجارتی خسارے میں کمی لانے میں مدد دے گا بلکہ ملکی معیشت کی مجموعی کارکردگی کو بھی بہتر بنائے گا۔