پشاور: خیبرپختونخوا حکومت نے صوبے کے زمینداروں سے 2 لاکھ 25 ہزار ٹن گندم خریدنے کا بڑا فیصلہ کرلیا ہے۔ حکومت نے اعلان کیا ہے کہ گندم کی خریداری 3500 روپے فی من کے حساب سے کی جائے گی تاکہ کسانوں کو ریلیف فراہم کیا جا سکے اور صوبے میں آٹے کے بحران پر قابو پایا جا سکے۔
مشیر خزانہ خیبرپختونخوا مزمل اسلم نے میڈیا سے گفتگو کرتے ہوئے کہا کہ صوبائی حکومت اپنے وسائل سے گندم خریدنے جارہی ہے۔ انہوں نے بتایا کہ کسانوں کو گندم کی سپلائی کے بعد 24 گھنٹوں کے اندر ادائیگی یقینی بنائی جائے گی تاکہ زمینداروں کو مالی مشکلات کا سامنا نہ کرنا پڑے۔
مزمل اسلم کے مطابق یہ اقدام کسانوں کے تحفظ اور زرعی شعبے کو مضبوط بنانے کے لیے اٹھایا گیا ہے۔ انہوں نے کہا کہ حکومت کسانوں کے مفادات کا ہر ممکن تحفظ کرے گی اور انہیں بہتر قیمت فراہم کی جائے گی۔
دوسری جانب خیبرپختونخوا میں امن و امان کی خراب صورتحال، گیس کی بندش اور آٹے کے بحران نے عوامی مشکلات میں مزید اضافہ کردیا ہے۔ شہریوں کو روزمرہ ضروریات کی فراہمی میں شدید دشواریوں کا سامنا ہے جس پر حکومت بھی تشویش کا اظہار کر رہی ہے۔
پشاور میں ہونے والے ایک اہم اجلاس میں وزیراعلیٰ خیبرپختونخوا سہیل افریدی، اپوزیشن رہنماؤں اور گورنر خیبرپختونخوا نے موجودہ صورتحال پر تبادلہ خیال کیا۔ اجلاس میں صوبے کو درپیش معاشی اور سیکیورٹی چیلنجز پر مشترکہ حکمت عملی اپنانے پر زور دیا گیا۔
وزیراعلیٰ سہیل افریدی نے کہا کہ گیس کی طویل بندش اور آٹے کے بحران نے عوام کی مشکلات میں بے پناہ اضافہ کیا ہے جبکہ امن و امان کی صورتحال بھی حکومت کے لیے ایک بڑا چیلنج بن چکی ہے۔ انہوں نے وفاقی حکومت سے مطالبہ کیا کہ صوبے کو اس کے آئینی حقوق دیے جائیں۔
