لاہور: قومی کرکٹ ٹیم کے وکٹ کیپر بیٹر اور سابق کپتان محمد رضوان نے اپنے خلاف جاری تحقیقات اور الزامات کے حوالے سے نیشنل سائبر کرائم انویسٹی گیشن ایجنسی (این سی سی آئی اے) سے دوبارہ رابطہ کرنے کا فیصلہ کیا ہے۔
ذرائع کے مطابق محمد رضوان این سی سی آئی اے کو ایک اور خط لکھیں گے، جس میں وہ اپنے خلاف عائد کیے جانے والے الزامات اور تحقیقات سے متعلق مزید وضاحت طلب کریں گے۔ رضوان کی جانب سے ادارے سے ان معاملات پر سوالات کیے جانے کا امکان ہے۔
ذرائع کا کہنا ہے کہ محمد رضوان خط میں اپنے حوالے سے سامنے آنے والی عدم تعاون کی افواہوں کے بارے میں بھی این سی سی آئی اے سے وضاحت طلب کریں گے۔ ان کا مؤقف ہے کہ وہ تحقیقات میں تعاون کے لیے تیار ہیں، تاہم انہیں اپنے خلاف الزامات کی تحریری تفصیلات فراہم کی جائیں۔
دستیاب معلومات کے مطابق محمد رضوان نے اپنی پہلی پیشی کے دوران این سی سی آئی اے کو اپنے موبائل فون تک رسائی فراہم کی تھی۔ ذرائع کے مطابق انہوں نے اسی موقع پر اپنے آئی فون کا پاس ورڈ بھی تحقیقاتی حکام کو دے دیا تھا۔
ذرائع کا کہنا ہے کہ پہلی پیشی کے بعد محمد رضوان کو تاحال این سی سی آئی اے کی جانب سے کوئی نیا نوٹس موصول نہیں ہوا۔ اسی طرح انہیں مبینہ عدم تعاون کے حوالے سے بھی ادارے کی جانب سے کوئی تحریری اطلاع نہیں دی گئی۔
ذرائع کے مطابق محمد رضوان تحقیقات میں تعاون جاری رکھنے کے لیے تیار ہیں، تاہم وہ اپنے خلاف لگائے گئے الزامات اور زیرِ تفتیش معاملات کی تحریری تفصیلات جاننا چاہتے ہیں۔ اسی مقصد کے لیے وہ این سی سی آئی اے سے دوبارہ باضابطہ رابطہ کرنے کا ارادہ رکھتے ہیں۔
