ایران کے سپریم لیڈر مجتبیٰ خامنہ ای نے ملک کی اعلیٰ فوجی قیادت میں اہم تبدیلیاں کرتے ہوئے 6 سینئر فوجی کمانڈرز کو اہم عہدوں پر مقرر کردیا ہے۔ ایرانی میڈیا کے مطابق نئی تقرریاں جنرل اسٹاف، پاسداران انقلاب اور بسیج فورس سمیت اہم عسکری اداروں میں کی گئی ہیں۔

رپورٹس کے مطابق احمد وحیدی کو میجر جنرل کے عہدے پر ترقی دے کر پاسداران انقلاب کور (IRGC) کا کمانڈر انچیف مقرر کیا گیا ہے۔ مصطفیٰ ایزدی کو ان کا نائب مقرر کیے جانے کی اطلاعات ہیں، جس کے بعد پاسداران انقلاب کی اعلیٰ کمان میں اہم تبدیلی سامنے آئی ہے۔

ایرانی میڈیا کے مطابق ریئر ایڈمرل علی عظمایی کو پاسداران انقلاب کی بحریہ کا کمانڈر مقرر کیا گیا ہے۔ دوسری جانب حسین طائب کو بسیج فورس کی قیادت سونپے جانے کی اطلاعات ہیں۔ بسیج ایران کے اہم نیم فوجی اداروں میں شمار ہوتی ہے۔

رپورٹس میں مزید بتایا گیا ہے کہ میجر جنرل علی عبداللہی کو مسلح افواج کا سربراہ مقرر کیا گیا ہے۔ ان کے نائب کے طور پر بریگیڈیئر جنرل کیومرث حیدری کی تقرری کی گئی ہے۔ یہ تبدیلیاں ایران کے اعلیٰ عسکری ڈھانچے میں اہم پیش رفت قرار دی جا رہی ہیں۔

تازہ تقرریوں کے نتیجے میں ایران کے دفاعی اور سکیورٹی اداروں میں متعدد اہم عہدوں پر نئی قیادت سامنے آئے گی۔ جنرل اسٹاف، پاسداران انقلاب اور بسیج جیسے اہم اداروں میں ہونے والی یہ تبدیلیاں ملکی سطح پر بھی خصوصی اہمیت رکھتی ہیں۔

دوسری جانب سپریم لیڈر مجتبیٰ خامنہ ای نے اپنے مشاورتی اور قومی سلامتی کے نظام میں بھی تبدیلیاں کی ہیں۔ اطلاعات کے مطابق محمد باقر ذوالقدر کو سپریم لیڈر کا سیاسی مشیر مقرر کیا گیا ہے، جبکہ ڈاکٹر محسن رضائی کو سپریم نیشنل سکیورٹی کونسل میں ان کا نمائندہ مقرر کیا گیا ہے۔