پاکستان نیوزی لینڈ تعلقات کو مزید مضبوط بنانے کے لیے دونوں ممالک نے تجارت، سرمایہ کاری اور تعلیمی تعاون بڑھانے پر اتفاق کیا ہے۔ یہ اتفاق رائے ویلنگٹن میں ہونے والے اعلیٰ سطح کے مذاکرات کے دوران سامنے آیا۔
پاکستان اور نیوزی لینڈ کے درمیان سیاسی مشاورت کا پانچواں دور 6 اگست کو منعقد ہوا، جس کے ساتھ مشترکہ تجارتی کمیٹی کا تیسرا اجلاس بھی ہوا۔ ملاقاتوں میں دوطرفہ تعلقات کے علاوہ علاقائی اور عالمی امور کا بھی جائزہ لیا گیا۔
سیاسی مشاورت میں پاکستان کی نمائندگی ایڈیشنل سیکریٹری خارجہ ڈاکٹر علی اسد گیلانی نے کی، جبکہ نیوزی لینڈ کے ڈپٹی سیکریٹری برائے خارجہ امور و تجارت گراہم مورٹن نے اجلاس کی مشترکہ صدارت کی۔ دونوں ممالک نے معیشت، سائنس، ٹیکنالوجی، تعلیم اور انسداد دہشت گردی سمیت مختلف شعبوں پر تبادلہ خیال کیا۔
🔈 PR No. 2️⃣0️⃣5️⃣/2️⃣0️⃣2️⃣6️⃣
Pakistan and New Zealand Hold Political Consultations and Joint Trade Committee Meetings in Wellington
🔗⬇️ pic.twitter.com/aaCKbpfLy2
— Ministry of Foreign Affairs – Pakistan (@ForeignOfficePk) August 8, 2026
مذاکرات کے دوران پاکستان نے مشرق وسطیٰ میں کشیدگی کم کرنے کی ضرورت پر زور دیا۔ پاکستانی وفد نے مقبوضہ کشمیر کی صورتحال اور سندھ طاس معاہدے کی مبینہ خلاف ورزیوں سے متعلق بھی نیوزی لینڈ کو آگاہ کیا۔ نیوزی لینڈ نے علاقائی امن کے لیے پاکستان کے کردار کو سراہا۔
مشترکہ تجارتی کمیٹی کے اجلاس میں پاکستان اور نیوزی لینڈ کے درمیان تجارت اور سرمایہ کاری بڑھانے پر توجہ دی گئی۔ زراعت، لائیو اسٹاک، انفارمیشن ٹیکنالوجی، تعلیم اور خدمات کے شعبوں میں تعاون کے امکانات کا جائزہ لیا گیا۔
دونوں وفود نے اون کی پیداوار اور پودوں کے تحفظ سمیت تکنیکی تعاون کے مواقع پر بھی بات چیت کی۔ فریقین نے مارکیٹ تک رسائی بہتر بنانے، پائیدار زراعت کو فروغ دینے اور اقتصادی تعاون کے لیے ادارہ جاتی نظام مضبوط بنانے پر اتفاق کیا۔
ملاقاتوں کے دوران پاکستان اور نیوزی لینڈ نے تعلیمی تعاون کا معاہدہ بھی کیا، جس کا مقصد ادارہ جاتی روابط اور تعلیمی تعاون کو فروغ دینا ہے۔ تازہ پیش رفت سے پاکستان نیوزی لینڈ تعلقات میں تجارت، سرمایہ کاری، تعلیم اور دیگر شعبوں میں مزید تعاون کے امکانات بڑھ گئے ہیں۔
