لاہور: پاکستان تحریک انصاف کے سیکرٹری جنرل سلمان اکرم راجہ نے 27 ستمبر کا لانگ مارچ بیک ڈور رابطوں کی وجہ سے ملتوی کیے جانے کی خبروں کو مسترد کردیا۔
لاہور میں میڈیا سے گفتگو کرتے ہوئے سلمان اکرم راجہ نے کہا کہ لانگ مارچ ملتوی کیے جانے کے بعد بھی حکومت کی جانب سے مذاکرات کے حوالے سے اب تک کوئی واضح سگنل نہیں ملا۔ تاہم، پی ٹی آئی نے حکومت کو مزید وقت دینے کا فیصلہ کیا ہے تاکہ وہ اپنے فیصلوں پر نظرثانی کرسکے۔
انہوں نے واضح کیا کہ 27 ستمبر کا لانگ مارچ کسی بھی بیک ڈور رابطے کے نتیجے میں ملتوی نہیں کیا گیا بلکہ یہ پارٹی کا اپنا فیصلہ تھا۔ ان کے مطابق پارٹی نے موجودہ صورتحال کو دیکھتے ہوئے حکومت کو مزید وقت دینے کا فیصلہ کیا۔
سلمان اکرم راجہ کا کہنا تھا کہ اگر حکومت کے ساتھ کوئی بات چیت یا رابطہ کاری ہوتی ہے تو علامہ ناصر عباس اور محمود خان اچکزئی اس حوالے سے موجود ہیں۔ انہوں نے کہا کہ ہر رابطہ یا بات چیت فوری طور پر عوام کے سامنے آنا ضروری نہیں ہوتا۔
پی ٹی آئی رہنما نے ملک میں دہشت گردی کی تازہ لہر کا ذکر کرتے ہوئے کہا کہ موجودہ صورتحال اس بات کا تقاضا کرتی ہے کہ تمام فریق ایک ساتھ بیٹھیں اور بات چیت کے ذریعے معاملات کو آگے بڑھانے کی کوشش کریں۔
انہوں نے کہا کہ اگر مذاکرات کے نتیجے میں کوئی فیصلہ سامنے آتا ہے تو پی ٹی آئی اس کی پاسداری کرے گی۔ ان کے مطابق پارٹی کا بنیادی مطالبہ بدستور یہی ہے کہ بانی پی ٹی آئی کو علاج کے لیے شفا انٹرنیشنل اسپتال منتقل کیا جائے۔
