برطانوی وزیراعظم کیئر اسٹارمر نے کہا ہے کہ ایران، امریکا اور اسرائیل کے درمیان ہونے والی جنگ برطانیہ کی جنگ نہیں تھی۔ یہ بات انہوں نے سعودی عرب پہنچنے پر گفتگو کرتے ہوئے کہی۔

انہوں نے کہا کہ امریکا اور ایران کے درمیان جنگ بندی ہو چکی ہے، تاہم اسے مستقل اور دیرپا بنانے کے لیے ابھی بہت کام کرنا باقی ہے۔ ان کے مطابق عارضی امن کو پائیدار استحکام میں تبدیل کرنا وقت کی اہم ضرورت ہے۔

کیئر اسٹارمر نے زور دیا کہ عالمی برادری کو مل کر خطے میں امن کے قیام کے لیے مزید کوششیں کرنا ہوں گی۔ انہوں نے کہا کہ اگرچہ کشیدگی میں کمی آئی ہے، لیکن بنیادی مسائل اب بھی حل طلب ہیں۔

انہوں نے واضح کیا کہ ان کی اولین ذمہ داری برطانیہ کا تحفظ ہے اور وہ اسی مقصد کے تحت فیصلے کر رہے ہیں۔ برطانیہ براہ راست جنگ کا حصہ بننے کے بجائے استحکام کے فروغ پر توجہ دے رہا ہے۔

برطانوی وزیراعظم نے آبنائے ہرمز کی اہمیت پر بھی زور دیا اور کہا کہ اس کا کھلا رہنا عالمی تجارت اور توانائی کی فراہمی کے لیے نہایت ضروری ہے۔ انہوں نے مزید کہا کہ اس مقصد کے لیے مختلف ممالک کو ساتھ ملا کر کام کیا جا رہا ہے اور سعودی عرب سمیت خطے کے دیگر ممالک سے مشاورت جاری رہے گی۔