اسلام آباد: فٹبال کی عالمی تنظیم فیفا نے ورلڈ کپ 2026 کی ریکارڈ تجارتی کامیابی کے بعد دنیا بھر میں فٹبال کی ترقی کے لیے فنڈنگ میں نمایاں اضافے کا منصوبہ بنایا ہے۔ مجوزہ منصوبے کے تحت 2027 سے 2030 کے دوران فٹبال کی ترقی کے لیے 6 ارب 35 کروڑ ڈالر مختص کرنے کی تجویز ہے، جس سے پاکستان سمیت فیفا کے تمام 211 رکن ممالک مستفید ہو سکتے ہیں۔
مجوزہ منصوبے کے مطابق ہر رکن فٹبال ایسوسی ایشن کو ڈھائی کروڑ ڈالر تک فنڈز فراہم کیے جا سکتے ہیں۔ فیفا کا مقصد آئندہ چار سالہ دورانیے میں فٹبال کی ترقی کے لیے مالی معاونت کو دگنا سے زیادہ کرنا ہے تاکہ مختلف ممالک میں کھیل کے فروغ اور بنیادی ڈھانچے کی بہتری کے لیے وسائل فراہم کیے جا سکیں۔
نئے فنڈنگ منصوبے کی حتمی منظوری مارچ 2027 میں ہونے والی فیفا کانگریس سے مشروط ہوگی۔ اس سے قبل فیفا کونسل دسمبر 2026 کے اجلاس میں مجوزہ منصوبے کی تفصیلات کو حتمی شکل دے گی۔ فنڈز کی تقسیم میں خواتین کے فٹبال، نوجوان کھلاڑیوں کی تربیت اور کھیلوں کے بنیادی ڈھانچے کی ترقی کو ترجیح دینے کی تجویز ہے۔
فیفا نے ہنگامی حالات اور غیر متوقع مالی ضروریات سے نمٹنے کے لیے ایک ارب 70 کروڑ ڈالر کے ذخائر برقرار رکھنے کی تجویز بھی پیش کی ہے۔ یہ اقدام عالمی سطح پر فٹبال کی ترقی کے لیے مجوزہ سرمایہ کاری کے ساتھ تنظیم کی مالی منصوبہ بندی کا حصہ ہے۔
دوسری جانب فیفا کے صدر جیانی انفینٹینو نے متنازع فیفا فارورڈ انٹرپرائز منصوبے میں غلطیوں کا اعتراف کرتے ہوئے معافی مانگ لی ہے۔ ان کے مطابق یہ منصوبہ مستقل طور پر واپس لے لیا گیا ہے اور اسے کسی بھی شکل میں دوبارہ متعارف نہیں کرایا جائے گا۔ انفینٹینو نے اس بات پر بھی زور دیا کہ فیفا کے فنڈز اس کی 211 رکن فٹبال ایسوسی ایشنز کی ملکیت ہیں۔
انفینٹینو کے مطابق گزشتہ دس سال کے دوران فی رکن ملک کے لیے فنڈنگ ایک ملین ڈالر سے بڑھا کر ڈھائی کروڑ ڈالر تک پہنچانے کا منصوبہ بنایا گیا ہے۔ مجوزہ اضافی فنڈنگ کا مقصد مختلف ممالک میں فٹبال کے فروغ اور کھیل تک رسائی کے مواقع بڑھانا ہے۔
فیفا کونسل نے تنظیمی گورننس میں ممکنہ اصلاحات کا جائزہ لینے کے لیے ورکنگ گروپ قائم کرنے کا بھی فیصلہ کیا ہے۔ اس کے علاوہ فیفا پیس پرائز سے متعلق معاملہ متعلقہ کمیٹی کو بھیجا گیا ہے، جس پر دسمبر کے اجلاس میں فیصلہ متوقع ہے۔
