پاکستانی ٹی وی میزبان اور ماڈل متھیرا نے ایک حالیہ انٹرویو میں مردوں کو درپیش سماجی اور ذہنی مسائل پر کھل کر اظہارِ خیال کیا۔ انہوں نے کہا کہ معاشرے میں مردوں سے غیر معمولی توقعات وابستہ کر دی جاتی ہیں، جس کے باعث وہ اپنے جذبات اور احساسات کا اظہار نہیں کر پاتے۔
گفتگو کے دوران متھیرا نے کہا کہ ان کے خیال میں بعض اوقات مردوں کے ساتھ ناانصافی بھی ہوتی ہے۔ انہوں نے مثال دیتے ہوئے کہا کہ بعض معاملات میں لوگ مکمل حقیقت جاننے سے پہلے ہی مرد کو قصوروار سمجھ لیتے ہیں، حالانکہ ہر واقعے کو غیر جانبداری سے دیکھنا ضروری ہے۔
متھیرا کے مطابق ہمارے معاشرے میں لڑکوں کی ایسی تربیت کی جاتی ہے کہ وہ اپنے جذبات کو کمزوری سمجھ کر چھپاتے رہتے ہیں۔ ان کا کہنا تھا کہ مردوں کو رونے، دکھ بانٹنے یا اپنی ذہنی کیفیت کے بارے میں کھل کر بات کرنے کی حوصلہ افزائی نہیں کی جاتی۔
انہوں نے کہا کہ "ہم نے اپنے مردوں کو مشین بنا دیا ہے” کیونکہ ان پر مسلسل معاشی اور خاندانی ذمہ داریاں ڈالی جاتی ہیں، جبکہ ان کی ذہنی اور جذباتی ضروریات کو اکثر نظر انداز کر دیا جاتا ہے۔
متھیرا کا کہنا تھا کہ مسلسل دباؤ کے باعث بہت سے مرد اپنی خاندانی زندگی میں بھی مشکلات کا سامنا کرتے ہیں۔ ان کے مطابق یہی دباؤ بعض اوقات انہیں اچھا باپ، شوہر یا بھائی بننے سے بھی دور کر دیتا ہے، کیونکہ وہ ذہنی طور پر تھکن کا شکار ہوتے ہیں۔
انہوں نے مزید کہا کہ معاشرے میں ایسے بے شمار مرد موجود ہیں جو ڈپریشن یا دیگر ذہنی مسائل کا سامنا کر رہے ہیں، لیکن وہ تنقید یا کمزوری کے تاثر کے خوف سے اپنے جذبات دوسروں کے سامنے ظاہر نہیں کرتے۔ ان کے مطابق مردوں کی ذہنی صحت پر بھی اتنی ہی سنجیدگی سے توجہ دی جانی چاہیے جتنی دیگر سماجی مسائل پر دی جاتی ہے۔
