بھارتی پولیس نے منگل کو نئی دہلی میں احتجاج کرنے والے اپوزیشن کے کئی ارکان پارلیمنٹ کو حراست میں لے لیا۔ مظاہرین چیف الیکشن کمشنر گیانیش کمار کے استعفے کا مطالبہ کر رہے تھے۔ بھارت میں انتخابی احتجاج ووٹر فہرستوں اور رجسٹریشن کے طریقہ کار میں تبدیلیوں پر پیدا ہونے والے تحفظات کے بعد کیا گیا۔
اپوزیشن جماعتوں اور نوجوانوں کی ایک تحریک سے وابستہ افراد نے پارلیمنٹ سے الیکشن کمیشن کے دفتر تک مارچ کیا۔ تقریباً ایک کلومیٹر طویل مارچ مرکزی دہلی سے گزرا، تاہم پولیس نے الیکشن کمیشن کے قریب مظاہرین کو روک دیا۔
مظاہرین نے ہاتھوں میں پلے کارڈز اور قومی پرچم اٹھا رکھے تھے اور گیانیش کمار کے خلاف نعرے لگائے۔ بعض مظاہرین نے الیکشن کمشنر پر جمہوری مفادات کے خلاف کام کرنے کے الزامات عائد کیے اور کہا کہ ووٹر فہرستوں میں تبدیلیاں ووٹ کے حق کو متاثر کرسکتی ہیں۔
کانگریس کے صدر ملکارجن کھرگے نے کہا کہ اپوزیشن جمہوری اداروں کے تحفظ کیلئے احتجاج کر رہی ہے۔ اپوزیشن جماعتوں نے ووٹر رجسٹریشن کے عمل میں شفافیت کا مطالبہ کیا ہے اور گیانیش کمار کی سربراہی میں الیکشن کمیشن کی غیر جانبداری پر سوالات اٹھائے ہیں۔
اپوزیشن رہنما راہول گاندھی، ان کی بہن پریانکا گاندھی اور دیگر ارکان بھی احتجاج میں شریک ہوئے۔ سکیورٹی اہلکاروں نے مظاہرین کو الیکشن کمیشن کے احاطے میں داخل ہونے سے روکنے کیلئے رکاوٹیں قائم کیں۔ بھارتی میڈیا کے مطابق راہول اور پریانکا گاندھی کو بھی مختصر وقت کیلئے حراست میں لیا گیا، بعد ازاں انہیں رہا کردیا گیا۔
حکمران بھارتیہ جنتا پارٹی نے اپوزیشن پر ملک میں بدامنی پیدا کرنے اور اداروں کو نشانہ بنانے کا الزام عائد کیا۔ بی جے پی ترجمان سمبت پاترا نے احتجاج کو سیاسی مقاصد کے حصول کی کوشش قرار دیا۔ الیکشن کمیشن اور بی جے پی نے ووٹر فہرستوں میں جانبداری کے الزامات کو مسترد کیا ہے۔
بھارت میں انتخابی احتجاج گزشتہ کئی روز سے جاری مظاہروں کا تازہ سلسلہ ہے، جس میں سیاسی جماعتوں اور طلبہ تنظیموں نے شرکت کی ہے۔ بھارتی سپریم کورٹ نے ووٹر فہرستوں کی نظرثانی اور چیف الیکشن کمشنر کے کردار سے متعلق الزامات پر دائر درخواستوں کی سماعت پر بھی آمادگی ظاہر کی ہے۔
